02 Jul,2024

ကျောက်ပန်းတောင်း ဇူလိုင် ၁

          မန္တလေးတိုင်းဒေသကြီး ညောင်ဦးခရိုင် ကျောက်ပန်းတောင်းမြို့နယ် ကျေးလက်လမ်းဖွံ့ဖြိုးရေးဦးစီးဌာနက ကျွဲကူး-စည်ပင်လမ်းပေါ်တွင် ကွန်ကရစ်ရေကျော်တည် ဆောက်နေမှုကို ဇွန် ၃၀ ရက်က တာဝန်ရှိသူများ ကွင်းဆင်းစစ်ဆေးခဲ့ကြောင်း သိရသည်။

        ထိုသို့ ကွင်းဆင်းစစ်ဆေးရာတွင် ကျေးလက်လမ်းဖွံ့ဖြိုးရေးဦးစီးဌာန(ရုံးချုပ်) နေပြည်တော်မှ အင်ဂျင်နီယာချုပ် ဦးလှခိုင်၊ ညောင်ဦးခရိုင်ကျေးလက်လမ်းဖွံ့ဖြိုးရေး ဦးစီးဌာနမှ လက်ထောက်ညွှန်ကြားရေးမှူး(မြို့ပြ) ဦးအေးလွင်နှင့် တာဝန်ရှိသူများက ၂၀၂၄-၂၀၂၅ ဘဏ္ဍာနှစ် ပြည်ထောင်စုခွင့်ပြုရန်ပုံငွေ ကျပ် ၉၈ ဒသမ ၃ သန်းဖြင့် ကျောက်ပန်းတောင်းမြို့နယ် ကျွဲကူး-စည်ပင်လမ်းပေါ်တွင် ကွန်ကရစ်ရေကျော်တည်ဆောက်နေမှုကိုစစ်ဆေးကြပြီး ကျောက်ပန်းတောင်းမြို့နယ် ကျေးလက်လမ်း ဖွံ့ဖြိုးရေးဦးစီးဌာနမှ ဦးစီးအရာရှိ(မြို့ပြ) ဒေါဖြိုးဖြိုးသိမ့်က လုပ်ငန်းဆောင်ရွက်နေမှုကို ရှင်းလင်းပြသရာ အင်ဂျင်နီယာချုပ်က သတ်မှတ်ကာလအတွင်း အချိန်မီပြီးစီးအောင် ဆောင်ရွက်ရန် မှာကြားကာ လုပ်ငန်းလိုအပ်ချက်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။

        ကျောက်ပန်းတောင်းမြို့နယ် ကျွဲကုန်း-စည်ပင်လမ်းပေါ်တွင် ကွန်ကရစ်ရေကျော်တည်ဆောက်ခြင်းသည် အလျားပေ ၁၆၀၊ အနံ ပေ ၂၀၊ အမြင့် ကိုးလက်မရှိပြီး  ကျောက်ပန်းတောင်းမြို့နယ် ကျေးလက်လမ်းဖွံ့ဖြိုးရေးဦးစီးဌာနက ဇွန် ၅ ရက်က စတင်ဆောင်ရွက်ခဲ့ရာ ယခုအခါ လုပ်ငန်းများ ၂ဝ ရာခိုင်နှုန်း ပြီးစီးပြီဖြစ်ကြောင်း၊ အဆိုပါ လုပ်ငန်းများ ရာနှုန်းပြည့်ပြီးစီးပါက ကျွဲကူး၊ ဥယျာဉ်၊ စည်ပင် ကျေးရွာရှိ လူဦးရေ ၂၇ဝ၄ ဦးအတွက် ပညာရေး၊ ကျန်းမာရေး၊ လမ်းပန်းဆက်သွယ်ရေးဖွံ့ဖြိုးတိုးတက် လာမည်ဖြစ်ကြောင်း၊ ကျေးလက်နေပြည်သူများ၏ လူမှုစီးပွားဘဝများဖွံ့ဖြိုးတိုးတက်စေရန် အကျိုးပြုမည်ဖြစ်ကြောင်း သိရသည်။

ကျော်ဇောဦး(မောရှမ်းမြေ)