15 Mar,2024

နေပြည်တော်၊ မတ် ၁၅

          သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန အနေဖြင့် နိုင်ငံတစ်ဝှမ်းရှိ စားသုံးသူများ ဘေးအန္တရာယ်ကင်းရှင်းစေရေးအတွက် စားသောက်ကုန်၊ လူသုံးကုန်ပစ္စည်းများအား ရုံးချုပ်အပါအဝင် တိုင်းဒေသကြီး/ ပြည်နယ်အားလုံးတွင် ဓာတ်ခွဲစမ်းသပ်ပေးမှုများ ဆောင်ရွက်ပေးလျက်ရှိရာ ၂၀၂၃-၂၀၂၄ ဘဏ္ဍာရေးနှစ်(ဧပြီလမှ မတ်လအထိ) အတွင်း ဓာတ်ခွဲ စမ်းသပ်ပေးမှု ၄၃၃၀ ကြိမ်လျာထားဆောင်ရွက်လျက်ရှိပြီး ၂၀၂၃-၂၀၂၄ ဘဏ္ဍာရေးနှစ်၊ ဖေဖော်ဝါရီလကုန် အထိ ၅၉၂၁ ကြိမ် ရာခိုင်နှုန်းအားဖြင့် ၁၃၇ % ဆောင်ရွက်နိုင်ခဲ့ရာ သတ်မှတ်လျာထားချက်ထက် ကျော်လွန်ဆောင်ရွက်နိုင်ခဲ့သည်။

          အသေးစားစက်မှုလက်မှုလုပ်ငန်းဦးစီးဌာနသည် အသေးစားစက်မှုထုတ်ကုန်များ အရည်အသွေး မှန်ကန်မှုရှိစေရေးနှင့် ဘေးအန္တရာယ်ကင်းရှင်းမှုရှိစေရေးတို့အတွက် ဓာတ်ခွဲစစ်ဆေးပေးခြင်းများ ဆောင်ရွက်ပေးလျက်ရှိရာ ရုံးချုပ်အပါအဝင် တိုင်းဒေသကြီး/ပြည်နယ် အသေးစားစက်မှုလက်မှုလုပ် ငန်းဦးစီးဌာနများရှိ ဓာတ်ခွဲခန်းများတွင် ပုဂ္ဂလိကလုပ်ငန်းရှင်များမှ ပေးပို့လာသော စားသောက်ကုန်၊ လူသုံးကုန်၊ အလှကုန်ပစ္စည်း နမူနာများ၊ တက္ကသိုလ်ဘွဲနှင့် စာတမ်းပြုစု ရန်အတွက် ပေးပို့လာသော စားသောက်ကုန်၊ လူသုံးကုန်၊ အလှကုန်ပစ္စည်း နမူနာများကို အရည်အသွေး ဓာတ်ခွဲစမ်းသပ်ပေးခြင်း၊ ဌာနတွင် မှတ်ပုံတင်ထားသော ထုတ်ကုန်ပစ္စည်းများကို ဘေးဥပဒ်ဖြစ်စေမည့် ဓာတုပစ္စည်းများ ပါဝင်မှု ရှိ/မရှိ သိရှိနိုင်ရန် ပစ္စည်းနမူနာအချို့ကို ရွေးချယ်၍ ဓာတ်ခွဲစမ်းသပ်ခြင်းလုပ်ငန်းများကိုလည်း ဆောင်ရွက်ပေးလျက်ရှိပြီး ဓာတုနှင့် အဏုဇီဝဓာတ်ခွဲစမ်းသပ်ခြင်း (Micro Analysis)တို့ကို ဆောင်ရွက်ပေးလျက်ရှိကြောင်း သိရသည်။

          အသေးစားစက်မှုလက်မှုလုပ်ငန်းဦးစီးဌာနအနေဖြင့် ၁၉၉၁ ခုနှစ်မှစတင်၍ အသေးစားစက်မှုလက်မှုလုပ်ငန်းမြှင့်တင်ရေး ဥပဒေရေးဆွဲပြီး ပြည်သူများ တစ်နိုင်တစ်ပိုင် လုပ်ငန်းထူထောင်နိုင်ရန်နှင့် ဘေးဥပဒ်အန္တရာယ်ကင်းရှင်းပြီး စံချိန်စံညွှန်းမီသည့် ထုတ်ကုန်များကို ထုတ်လုပ်နိုင်ရန် နည်းပညာပံ့ပိုးပေးခြင်း၊ လိုအပ်သော ရင်းနှီးပစ္စည်းများထောက်ပံ့ပေးခြင်း၊ လုပ်ငန်းမှတ်ပုံတင်ပေးခြင်းများကို ဆောင်ရွက်ပေးလျက်ရှိကြောင်း သတင်းရရှိသည်။