27 Feb,2024
ကွန်ဟိန်း ဖေဖော်ဝါရီလ ၂၇ ရက်
သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ရှမ်းပြည်နယ်(တောင်ပိုင်း)၊ နမ့်စန် ခရိုင်၊ ကွန်ဟိန်းမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနက မြို့မကျေးရွာအုပ်စု၊ ဝမ်ဟိန်းကျေးရွာ၌ ကျေးလက်ကုန်ထုတ်လမ်း/တံတားများဖောက်လုပ် ပြီးစီးမှု အခြေအနေများကို ယနေ့ နံနက်ပိုင်းက တာဝန်ရှိသူများမှ အဆိုပါကျေးရွာ ၌ ကွင်းဆင်းစစ်ဆေးခဲ့သည်။
ထိုသို့ကွင်းဆင်းစစ်ဆေးရာတွင် ကွန်ဟိန်းမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးအောင်ကျော်ဟိန်း
နှင့် ဝန်ထမ်းများ သည် ဝမ်ဟိန်းကျေးရွာတွင် အရှည် ၁ မိုင် ၊ အကျယ် မြေသား ၁၆ပေ သဲဗြုန်း ၁၂ပေ ၊ ထု မြေသား ၁ပေ ၊ သဲဗြုန်း ၉လက်မရှိ ကျေးလက်ကုန်ထုတ်လမ်းဖောက်လုပ်ခြင်းနှင့် ၎င်းလမ်းပေါ်၌ အလျား ၂၂ပေ၊ အနံ ၅ ပေ၊ အမြင့် ၅ပေရှိ Slab Culvert ကုန်ထုတ် တံတား(၂)စင်း တည်ဆောက်ပြီးစီးမှု အခြေအနေများကို ကြည့်ရှု့စစ်ဆေးခဲ့ပြီး မြို့နယ်ဦးစီးမှူး က အဆိုပါကျေးရွာရှိ ရပ်မိရပ်ဖများ ၊ကျေးရွာသူ/သားများနှင့် တွေ့ဆုံကာ ဆောင်ရွက်ပြီးသော ကျေးလက်ကုန်ထုတ်လမ်းအား ရေရှည်တည်တံ့အောင် ဝိုင်းဝန်းထိန်းသိမ်းကြရန် ဆွေးနွေးမှာကြားသည်။
အဆိုပါ ကျေးလက်ကုန်ထုတ်လမ်း နှင့် တံတားများကို ၂၀၂၃-၂၀၂၄ ခု ဘဏ္ဍာရေးနှစ် ပြည်နယ် ခွင့်ပြုရန်ပုံငွေကျပ် ( ၅၃ ဒသမ ၃၀၉)သန်းကို အသုံးပြု၍ မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မှ ဝန်ထမ်းများနှင့် ကျေးရွာသူ/သားများပူးပေါင်းကာ ၂၀၂၃ခုနှစ် ဒီဇင်ဘာလ ဒုတိယအပတ်က စတင် အကောင် အထည်ဖော် ဆောင်ရွက်ခဲ့ရာ ယခုအခါ လုပ်ငန်းများ အားလုံးရာနှုန်းပြည့် ဆောင်ရွက် ပြီးစီးပြီဖြစ်၍ အဆိုပါကျေးရွာရှိ လူဦးရေ(၃၀၁)ဦးတို့၏ လယ်ယာဧက (၂၀၀)ကျော်မှ ထွက်ရှိသည့် စိုက်ပျိုး သီးနှံ များ ဈေးကွက်အတွင်းသို့ ကုန်ကျ စရိတ်သက်သာစွာဖြင့် သယ်ယူပို့ဆောင်နိုင်ပြီဖြစ်ကြောင်း ကွန်ဟိန်းမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးအောင်ကျော်ဟိန်း ထံမှသိရသည်။