17 Dec,2024

တောင်ကြီး ဒီဇင်ဘာ ၁၃

          ရှမ်းပြည်နယ် (တောင်ပိုင်း)တောင်ကြီးမြို့နယ် ကျေးလက်လမ်းဖွံ့ဖြိုးရေးဦးစီးဌာနမှ ၂၀၂၄ - ၂၀၂၅ ဘဏ္ဍာနှစ် ပြည်နယ်ငွေလုံးငွေရင်းရန်ပုံငွေဖြင့် သိမ်ကုန်း-ပန့်ပုံးလမ်းအား မြေသားလမ်းမှ ကျောက်ချောလမ်းသို့ အဆင့်မြှင့်တင်ခြင်းလုပ်ငန်းများ ဆောင်ရွက်နေမှုအခြေအနေများကို ဒီဇင်ဘာလ ၁၃ ရက်တွင် တာဝန်ရှိသူများက ကွင်းဆင်းစစ်ဆေးကြောင်း သိရသည်။

         ထိုသို့ကွင်းဆင်းစစ်ဆေးရာတွင် ရှမ်းပြည်နယ်(တောင်ပိုင်း) ကျေးလက်လမ်းဖွံ့ဖြိုးရေးဦးစီးဌာန ညွှန်ကြားရေးမှူး(မြို့ပြ) ဦးမျိုးမင်းသန့်နှင့် တောင်ကြီးခရိုင်လက်ထောက်ညွှန်ကြားရေးမှူး(မြို့ပြ) ဦးဟန်ကိုကိုစိုးတို့က သိမ်ကုန်း-ပန့်ပုံးလမ်း အရှည် ၅ ဒသမ ၃၅၅ ဖာလုံ၊ အကျယ် ၁၆ ပေ၊ထု ၆ လက်မရှိ ကျောက်ချောလမ်းခင်းခြင်း လုပ်ငန်းများ ဆောင်ရွက်နေမှုအခြေအနေများကိုကြည့်ရှုစစ်ဆေးပြီး မြို့နယ်တာဝန်ခံအင်ဂျင်နီယာ ဒေါ်ခိုင်ဇာလွင်က လုပ်ငန်းဆောင်ရွက်နေမှုများအားရှင်းလင်းတင်ပြသည်။

         အဆိုပါ သိမ်ကုန်း-ပန့်ပုံးလမ်းအား မြေလမ်းမှ ကျောက်ချောလမ်းသို့ အဆင့်မြှင့်တင်ခြင်းလုပ်ငန်းကို ၂၀၂၄-၂၀၂၅ ဘဏ္ဍာနှစ် ပြည်နယ်ငွေလုံးငွေရင်း ခွင့်ပြုရန်ပုံငွေကျပ် ၈၂ ဒသမ ၀၇၇ သန်းဖြင့် အကောင်အထည်ဖော်ဆောင်ရွက်ရာ လုပ်ငန်းများအားလုံး၏ ၈၀ ရာခိုင်နှုန်းခန့် ဆောင်ရွက်ပြီးစီးနေပြီဖြစ်သည်။ လုပ်ငန်းများ ရာနှုန်းပြည့်ဆောင်ရွက်ပြီးစီးပါက ကျေးရွာလေးရွာရှိ အကျိုးပြုအိမ်ခြေ ၁၀၀၃ အိမ်၊ လူဦးရေ ၄၀၁၂ ဦးတို့၏ စိုက်ပျိုးမြေ ဧက ၅၃၂၀ အား အကျိုးပြုမည်ဖြစ်ကြောင်း သိရသည်။

ချိုသန်းညွန့် (ကျေးလက်)