23 Oct,2024

ချောက် အောက်တိုဘာ ၂၂

            မကွေးတိုင်းဒေသကြီး ချောက်မြို့နယ် ချောက်-မကွေးကားလမ်းမကြီးမှ တောင်တဲကြီးကျေးရွာအဝင်လမ်း မြေနီလမ်းခင်းခြင်း ဆောင်ရွက်နေမှု အခြေအနေများကို အောက်တိုဘာလ ၂၂ ရက်တွင် မြို့နယ်ကျေးလက်လမ်းဖွံ့ဖြိုးရေးဦးစီးဌာနမှ တာဝန်ရှိသူများ ကွင်းဆင်းစစ်ဆေးကြကြောင်း သိရသည်။

         ထိုသို့ ကွင်းဆင်းစစ်ဆေးရာတွင် ချောက်မြို့နယ်ကျေးလက်လမ်းဖွံ့ဖြိုးရေးဦးစီးဌာန ဦးစီးအရာရှိ(မြို့ပြ) ဒေါ်အေးလဲ့လဲ့စိုးနှင့် တာဝန်ရှိသူများက ချောက်မြို့နယ် ချောက်-မကွေးကားလမ်းမကြီးမှ တောင်တဲကြီးကျေးရွာအဝင်လမ်း မြေနီလမ်းခင်းခြင်းဆောင်ရွက်ပြီးစီးမှု အခြေအနေများကို ကြည့်ရှုစစ်ဆေးပြီး မြို့နယ်ဦးစီးအရာရှိက လိုအပ်သည်များမှာကြားသည်။

             အဆိုပါ တောင်တဲကြီးကျေးရွာ၌ အရှည် တစ်မိုင်၊ အကျယ် ၁၈ ပေ၊ ထု ၈ လက်မရှိ ကျေးရွာအဝင်လမ်း မြေနီခင်းခြင်းလုပ်ငန်းကို ပြည်ထောင်စုငွေလုံးငွေရင်းခွင့်ပြုငွေ ငွေကျပ် ၃၈ ဒသမ ၅ သန်းဖြင့် တင်ဒါအောင်မြင်သည့် Win & Mo ကုမ္ပဏီက ဇွန်လ တတိယပတ်မှစ၍ လုပ်ငန်းများ ဆောင်ရွက်ခဲ့ရာ ယခုအခါ ရာနှုန်းပြည့် ဆောင်ရွက်ပြီးစီးပြီဖြစ်သည်။

            ယင်းကျေးရွာအဝင်လမ်း ဆောင်ရွက်ပြီးစီးမှုကြောင့် တောင်တဲကြီးကျေးရွာအပါအဝင် ကျေးရွာ ငါးရွာရှိ အိမ်ခြေ ၉၈၉ အိမ်၊ လူဦးရေ ၄၅၉၂ ဦးအတွက် လမ်းပန်းဆက်သွယ်ရေး အဆင်ပြေနိုင်ပြီဖြစ်ကြောင်း သိရသည်။

သန်းလွင်(မကွေး)