08 Aug,2022

မြင့်စိုး(နတလ)

မြစ်ကြီးနားမြို့နယ်ထဲက မော်ဖောင်းစံပြကျေးရွာ

သမဝါယမနှင့်ကျေးလက်ဖွံ့ဖြိုးရေးဝန်ကြီးဌာနသည် နေပြည်တော်၊ တပ်ကုန်းမြို့နယ်၌ ဂွေးပင်ကျေးရွာ၊ ပျဉ်းမနားမြို့နယ်၌ ကျွန်းဦးကျေးရွာ၊ လယ်ဝေးမြို့နယ်၌ သော်မှော်ကုန်း ကျေးရွာတို့ကို SMART Village စံပြကျေးရွာများအဖြစ် စတင်အကောင်အထည်ဖော် ဆောင် ရွက်ပြီးနောက် ၂၀၂၂-၂၀၂၃ ဘဏ္ဍာနှစ်မှစ၍ ပြည်နယ်နှင့် တိုင်းဒေသကြီးအသီးသီးတွင် SMART Village စံပြကျေးရွာပေါင်း ၄၂ ရွာ အကောင်အထည်ဖော် ဆောင်ရွက်နေပြီ ဖြစ်ပါသည်။ စီမံကိန်းကာလမှာ ၂ နှစ် ဖြစ်သည်။ ယင်းကာလအတွင်း သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၏ ပြည်ထောင်စုရန်ပုံငွေ၊ ပြည်နယ်နှင့် တိုင်းဒေသကြီး အစိုးရအဖွဲ့ရန်ပုံငွေ၊ အခြားသောဆက်စပ်ဝန်ကြီးဌာနများ၏ ပြည်ထောင်စုရန်ပုံငွေများဖြင့် ကျေးရွာတွင်းလမ်းများ ကွန်ကရစ်ခင်းခြင်း၊ ကုန်ထုတ်လမ်းများဖောက်လုပ်ပေးခြင်း၊ စက်ရေ တွင်းများတူးဖော်၍ သန့်ရှင်းသောသောက်သုံးရေကို အိမ်အရောက်သွယ်တန်းပေးခြင်း၊ လျှပ်စစ်မီးသွယ်တန်းရေးအတွက်လိုအပ်ချက်များ ဖြည့်ဆည်းဆောင်ရွက်ပေးခြင်း၊ ပညာရေးနှင့် ကျန်းမာရေးကဏ္ဍတွင် လိုအပ်သည်များ ညှိနှိုင်းဆောင်ရွက်ပေးခြင်း၊ ဘက်စုံသုံးခန်းမ၊ အားကစားကွင်း၊ စာကြည့်တိုက် စသည်တို့အတွက် ဖြည့်ဆည်း ဆောင်ရွက်ပေးခြင်း၊ အသက်မွေး ဝမ်းကျောင်းအထောက်အကူပြုသင်တန်းများနှင့် တန်ဖိုးမြှင့်ထုတ်ကုန် (Value Added) သင်တန်းများ ဖွင့်လှစ်သင်ကြားပေးခြင်း၊ မွေးမြူရေးအခြေခံ စံပြကျေးရွာဖြစ်လျှင် ကြက်၊ ဝက်၊ နွား မွေးမြူရေးအစုအဖွဲ့များ၊ သမဝါယမအသင်းများ ဖွဲ့စည်း၍ လိုအပ်သည့် မျိုး၊ နည်းပညာ စသည်တို့ ကူညီပံ့ပိုးပေးခြင်း၊ အခြားသော ကျန်းမာရေးအသိပညာပေး၊ မွေးမြူရေးအသိပညာပေး၊ ယာဉ်စည်းကမ်း၊ လမ်းစည်းကမ်းအသိပညာပေး၊ မူးယစ်ဆေးဝါး အသိပညာပေး၊ ကျေးရွာစွန့်ပစ်အမှိုက် စီမံခန့်ခွဲမှုအသိပညာပေး၊ သဘာဝပတ်ဝန်းကျင် ကာကွယ်ထိန်းသိမ်းရေး အသိပညာပေး၊ လူမှုကာကွယ်စောင့်ရှောက်ရေး အသိပညာပေး စသည့် ပညာပေးဟောပြောပို့ချမှုများ ပြုလုပ်ခြင်းတို့ကို အကောင်အထည်ဖော် ဆောင်ရွက်သွားမည် ဖြစ်ပါသည်။

ကချင်ပြည်နယ်အတွင်း၌ SMART Village ကျေးရွာများအဖြစ် မြစ်ကြီးနားမြို့နယ်တွင် မော်ဖောင်း၊ နယ်မြေ-၈ ကျေးရွာ၊ ဗန်းမော်မြို့နယ်တွင် မန်ရေးကျေးရွာ၊ မိုးကောင်းမြို့နယ်တွင် နန့်လှိုင်ကျေးရွာတို့အား သတ်မှတ်ရွေးချယ် အကောင်အထည်ဖော် ဆောင်ရွက်ပေးနေပြီ ဖြစ်သည်။ အခြားသော ပြည်နယ်၊ တိုင်းဒေသကြီး တော်တော်များများထဲက SMART Village စံပြကျေးရွာအချို့ကို ကျွန်တော်သွားခဲ့ ရောက်ခဲ့ပြီးဖြစ်သည်။ ကချင်ပြည်နယ်ထဲမှာ လတ်တလော သွားလာနိုင်သောရွာကို ကြည့်လိုက်တော့ မော်ဖောင်းကို သွားတွေ့ရသည်။ သည့်အတွက် မော်ဖောင်းစံပြကျေးရွာကို အဓိကဦးတည်ပြီး အခြားသော ဖွံ့ဖြိုးရေးလုပ်ငန်းများ၊ သမဝါယမလုပ်ငန်းများ၊ ဦးစီးဌာနများ၊ သင်တန်းကျောင်းများအား   ကွင်းဆင်းကြည့်ရှု ဆောင်ရွက်ရန်အလို့ငှာ ပြီးခဲ့သည့် ဩဂုတ်လ ၃ ရက်နေ့မှ ၅ ရက်နေ့ထိ ကချင်ပြည်နယ်၊ မြစ်ကြီးနားမြို့နယ်ခရီးစဉ်ကိုရေးဆွဲပြီး ထွက်ခွာလာခဲ့ကြသည်။ကျွန်တော်နှင့်အတူ သမဝါယမဦးစီးဌာန၊ ဒုတိယညွှန်ကြားရေးမှူးချုပ် ဦးသောင်းနိုင်၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ ဒုတိယညွှန်ကြားရေးမှူးချုပ် ဦးမျိုးနိုင်အောင်၊ အသေးစားစက်မှုလက်မှုလုပ်ငန်းဦးစီးဌာန၊ ဒုတိယညွှန်ကြားရေးမှူးချုပ် ဦးကျော်ဇင်လတ်၊ ကျေးလက်လမ်းဖွံ့ဖြိုးရေးဦးစီးဌာန အင်ဂျင်နီယာချုပ် ဦးထွန်းဝေတို့ လိုက်ပါလာခဲ့ကြသည်။

မော်ဖောင်း၊ နယ်မြေ-၈ စံပြကျေးရွာတွင် ၂၀၂၂-၂၀၂၃ ဘဏ္ဍာနှစ် ဆောင်ရွက်ပေးနေသော လုပ်ငန်းများမှာ ဘက်စုံသုံးခန်းမတည်ဆောက်ခြင်း၊ ကျေးရွာတွင်း ရေမြောင်းများ တူးဖော်ခြင်း၊ အမကကျောင်းခြံစည်းရိုးကာရံခြင်း၊ ကုန်ထုတ်လမ်းပေါ်၌ Box Culvert(၁)စင်း တည်ဆောက်ခြင်း၊ စိုက်ပျိုးရေး မွေးမြူရေးလုပ်ငန်းများ စတင်အကောင်အထည်ဖော်ခြင်းတို့ ဖြစ်သည်။ ၂၀၂၃-၂၀၂၄ ဘဏ္ဍာနှစ်တွင် ဆက်လက်ဆောင်ရွက်မည့်လုပ်ငန်းများမှာ မော်ဖောင်း ရွာမှ မြစ်ကြီးနားမြို့ရှောင်လမ်းသို့ ဆက်သွယ်ထားသော လမ်း ၁/၄ မိုင်အား ကွန်ကရစ် ခင်းခြင်း၊ ရွာတွင်းလမ်းများ ကွန်ကရစ်ခင်းခြင်း၊ စက်ရေတွင်းတူး၍ အိမ်တိုင်ရာရောက် ရေသွယ်တန်းပေးခြင်း၊ ရွာတွင်းလမ်းမီးတိုင်များ စိုက်ထူခြင်း၊ အားကစားကွင်းပြုပြင်ခြင်း၊ ကျေးရွာစာကြည့်တိုက် ဆောက်လုပ်ပေးခြင်းများ ဆောင်ရွက်သွားမည်ဖြစ်သည်။ ယင်း လုပ်ငန်းများနှင့်အတူ စောစောကကျွန်တော်တင်ပြခဲ့ပြီးသော သင်တန်းအမျိုးမျိုးကိုပါ အချိန် နှင့်တစ်ပြေးညီ ပို့ချသင်ကြားပေးဦးမည်ဆိုတော့ကာ မော်ဖောင်းစံပြကျေးရွာအတွက် အစစ အရာရာ ပြည့်စုံနေပြီ ဖြစ်သည်။ မော်ဖောင်းကျေးရွာနေ ဒေသခံတိုင်းရင်းသားများအတွက် ပို၍ ဝမ်းမြောက်ဖွယ်ရာမြင်ကွင်းတစ်ခုကတော့ သမဝါယမနှင့် ကျေးလက်ဖွံ့ဖြိုးရေးဝန်ကြီး ဌာန၊ ကျေးလက်လမ်းဖွံ့ဖြိုးရေးဦးစီးဌာန၏ ပြည်နယ်အစိုးရရန်ပုံငွေဖြင့် ခွင့်ပြုခဲ့သော မော်ဖောင်း-ငါးအိုးတံတား ပေ ၃၀၀ ကို မူလကြိုးတံတားအစား သံကူကွန်ကရစ်တံတားကြီး အဖြစ် စတင်တည်ဆောက်နေခြင်းပင် ဖြစ်သည်။ တံတားကြီးကို ဆောက်လုပ်ရေးဝန်ကြီးဌာန တံတားအထူးအဖွဲ့မှ တာဝန်ယူတည်ဆောက်ပေးလျက်ရှိသည်။ ယင်းတံတားကြီး တည်ဆောက် ပြီးစီးပါက မော်ဖောင်း SMART Village စံပြကျေးရွာ၏ ဂုဏ်ရောင်ပို၍ပို၍ ထွန်းလင်း တောက်ပြောင်တော့မည်မှာ မလွဲပေ။

ကျွန်တော်နှင့် ကချင်ပြည်နယ်

ဆောင်းပါးခေါင်းစဉ်မှာကတည်းက ကချင်ပြည်နယ်နှင့်ပတ်သက်၍ ကျွန်တော်ရည်ညွှန်း လိုသော ဝိသေသတစ်ချို့ပါဝင်သွားပြီ ဖြစ်ပါသည်။ တပ်မတော်သားဘဝ ကချင်ပြည်နယ် မြို့ ရွာများတွင် တာဝန်ထမ်းဆောင်ခဲ့ဖူးခြင်းမရှိသဖြင့် ကချင်ပြည်နယ်သည် ကျွန်တော့်အတွက် စိမ်းသည်ဟုပြောနိုင်ပါသည်။ သို့သော် ကျွန်တော်က နယ်ဘက်တာဝန်ကူးပြောင်းထမ်းဆောင် ခဲ့သူဖြစ်၍ နယ်စပ်ရေးရာဝန်ကြီးဌာန၊ နယ်စပ်ဒေသနှင့် တိုင်းရင်းသားလူမျိုးများဖွံ့ဖြိုး တိုးတက်ရေးဦးစီးဌာန၏ ဝန်ထမ်းဘဝဖြင့် ကချင်ပြည်နယ် မြို့ရွာဒေသတစ်ချို့မှာ နယ်စပ် ဖွံ့ဖြိုးရေးလုပ်ငန်းများ၊ ငြိမ်းချမ်းရေးတည်ဆောက်မှုလုပ်ငန်းများကို ပါဝင်ထမ်းရွက်ခွင့်ရခဲ့ သည်။ နတလလုပ်ငန်းကော်မတီ အတွင်းရေးမှူး၊ နယ်စပ်ရေးရာဝန်ကြီးဌာန၊ ဒုတိယဝန်ကြီး ဗိုလ်ချုပ်ဇော်ဝင်း(ငြိမ်း) ခေါင်းဆောင်၍ ၂၀၁၂ ခုနှစ် ဖေဖော်ဝါရီလတွင် သွားရောက်ခဲ့သည့် ကချင်ပြည်နယ်၊ မြစ်ကြီးနား၊ ဝိုင်းမော်၊ ဗန်းမော်၊ မိုးမောက်နှင့် မံစီ ခရီးစဉ်သည် ကျွန်တော့် အတွက် ပထမဦးဆုံးသော ကချင်ပြည်နယ်ခရီးစဉ် ဖြစ်ပါသည်။ ယင်းခရီးစဉ်တွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဒုတိယဝန်ကြီး ဦးဘုန်းဆွေ(ငြိမ်း)၊ ပြည်သူ့လွှတ်တော်ကိုယ်စားလှယ် ဦးထွန်းထွန်း၊ အမျိုးသားလွှတ်တော် ကိုယ်စားလှယ်များ ဖြစ်ကြသော ဦးခက်ထိန်နန် (ယခုကချင်ပြည်နယ်အစိုးရအဖွဲ့ဝန်ကြီးချုပ်) နှင့် ဦးစံထွန်း၊ အမျိုးသားလူ့အခွင့်အရေးကော်မရှင် အတွင်းရေးမှူး ဦးစစ်မြိုင်(ငြိမ်း)၊ မြန်မာ နိုင်ငံကျောက်မျက်လုပ်ငန်းရှင်များအသင်း ဒုတိယဥက္ကဋ္ဌ ဦးရိုးမူ၊ ကယ်ဆယ်ရေးနှင့် ပြန်လည် နေရာချထားရေးဦးစီးဌာန ညွှန်ကြားရေးမှူးချုပ် ဦးစိုးအောင် (ဒုဝန်ကြီး-ငြိမ်း)၊ နတလ ဦးစီးဌာန ဒုတိယညွှန်ကြားရေးမှူးချုပ် ဦးစိုးတင့် (ယခု ပြည်ထောင်စုရာထူးဝန်အဖွဲ့၊ အဖွဲ့ဝင်)၊ စာရေးသူကျွန်တော် ညွှန်ကြားရေးမှူး ဦးမြင့်စိုးတို့ ပါဝင်ပါသည်။ ခေတ္တတိုက်ပွဲရှောင်စခန်း များမှ မိသားစုများနှင့်တွေ့ဆုံ၍ အားပေးစကားများ ပြောကြားကာ ကူညီထောက်ပံ့မှုများ ပေးခဲ့ကြသည်။ ၂၀၁၂ ခုနှစ်၊ မေလတွင်လည်း ကချင်ပြည်နယ်ခရီးစဉ် ဒုတိယအကြိမ်အဖြစ် ထပ်မံရောက်ခဲ့သည်။ ကုလသမဂ္ဂအဖွဲ့အစည်းများ၊ နိုင်ငံတကာအစိုးရမဟုတ်သော အဖွဲ့ အစည်းများ ဖြစ်ကြသည့် UNOCHA၊ UNICEF၊ WFP၊ UNDP၊ UNHCR၊ ICRC တို့ကို ဗိုလ်ချုပ်ဇော်ဝင်းကပင် ဦးဆောင်၍ အထက်ပါနယ်မြေအသီးသီးက ခေတ္တတိုက်ပွဲရှောင်စခန်းများသို့ လိုက်လံပြသပေးခဲ့ခြင်း ဖြစ်ပါသည်။

ဆက်လက်၍လည်း ပြည်ထောင်စုဝန်ကြီးများ ဖြစ်ကြသည့် ဦးအောင်မင်း၊ ဦးစိုးသိန်း၊ ဦးခင်မောင်စိုးတို့ ဦးဆောင်၍ ကချင်ပြည်နယ်၊ မြစ်ကြီးနားမြို့ မနောကွင်းခန်းမ၌ ကျင်းပပြုလုပ်ခဲ့သော ကေအိုင်ကေ/ ကေအိုင်အိုနှင့် ငြိမ်းချမ်းရေးဆွေးနွေးပွဲသို့ ဗိုလ်ချုပ်ဇော်ဝင်းနှင့် အတူ လိုက်ပါခဲ့ရသည်။ တစ်ဖန် ပြည်ထောင်စုဝန်ကြီး ဒုတိယဗိုလ်ချုပ်ကြီးသက်နိုင်ဝင်း(ငြိမ်း) နှင့်အတူ ပြည်ထောင်စုဝန်ကြီးများ ဖြစ်ကြသော ဦးလှထွန်း၊ ဦးဇော်မင်း၊ ဦးသန်းဌေးတို့၏ မြစ်ကြီးနားခရီးစဉ်ကို ထပ်မံလိုက်ပါခဲ့ရသည်။ ဤသည်တို့ကား ကျွန်တော့်အတွက် စိမ်း၍ မစိမ်းသော မနောမြေ၏ အစခရီးစဉ်များ ဖြစ်ပေတော့သတည်း။

ကျွန်တော်နှင့် မဂွေဇ-ခေါင်လန်ဖူးကားလမ်း

နယ်စပ်ရေးရာဝန်ကြီးဌာနသည် ကချင်ပြည်နယ်၊ ပူတာအိုခရိုင်အတွင်းက မဂွေဇ- ခေါင်လန်ဖူးကားလမ်း ၆၅/၄ မိုင်ကို ၂၀၁၇-၂၀၁၈ ဘဏ္ဍာနှစ်မှစတင်၍ အပိုင်း ၄ ပိုင်းခွဲကာ ဖောက်လုပ်ခဲ့သည်။ နတလဦးစီးဌာနက တာဝန်ယူကွပ်ကဲကြပ်မတ် ဖောက်လုပ်ခဲ့ရသည်ဖြစ် ပေရာ ယင်းလမ်းဖောက်လုပ်ရေးစီမံကိန်းကို အကြောင်းပြုလျက် ပူတာအို၊ မချမ်းဘော့၊ နောင်မွန်၊ ပန်နန်းဒင်၊ ခေါင်လန်ဖူးဒေသများသို့ မရောက်မဖြစ် ရောက်ခဲ့ရသည်။ ကောင်းမှုလုန်စေတီတော်နှင့် နတ်ကျွန်းစေတီတော်တို့ကို ဖူးမြော်ခွင့်ရခဲ့သည်။ မဂွေဇ-ခေါင်လန်ဖူးကားလမ်း ၆၅/၄ မိုင် ဖောက်လုပ်ရာတွင် အခက်ခဲဆုံးအပိုင်းမှာ အမြင့်ပေ ၇၇၀၀ ရှိ ဆန်းလွတ်ချက် ကျောက်ဆောင်ကြီးတည်ရှိရာ နေရာပဲ ဖြစ်သည်။ ၄ မိုင်ခန့် ရှည်လျားသော ကျောက်တောင်ကြီးကို တပ်မတော်မှ တွဲဖက်ပေးထားသည့် အင်ဂျင်နီယာစစ်သည်များက ခက်ခက်ခဲခဲ မိုင်းများခွဲ၍ ဖောက်ခဲ့ရသည်။ တစ်ချို့ရက်များတွင် ရှေ့သို့ ၁၀ ပေပင် မရောက် နိုင်ခဲ့ပါ။ ၃၃/၆ မိုင် ခရီးတွင်ရှိနေသော ဆန်းလွတ်ချက်တောင်ထိပ်သို့ လမ်းမပေါက်မီကပင် ခြေကျင်တက်၍ အရောက်သွားခဲ့တာကိုတော့ဖြင့် ဒီတစ်သက်မေ့တော့မည် မဟုတ်ပါ။ ခေါင်လန်ဖူးသို့ ကားလမ်းပေါက်ရန် မိုင် ၂၀ ခန့်အလိုကတည်းက ဆိုင်ကယ်စီး၍ အရောက် သွားခဲ့တာကိုလည်း အမှတ်ရနေပါသည်။ ခေါင်လန်ဖူးမြို့လေးအပေါ် မည်မျှလောက် သံယောဇဉ် ကြီးမားသွားခဲ့ရသလဲဆိုလျှင် နတလမှ သက်ပြည့်အငြိမ်းစားယူပြီးသည့်ကာလ ၂၀၁၉ ဇန်နဝါရီလ ၂၃ ရက်နေ့မှာပင် အင်ဂျင်နီယာမှူးကြီး ဦးခင်မောင်လတ်နှင့်အတူ ရောက်ခဲ့သေး၏။ ထိုအချိန်တွင် မဂွေဇမှ ခေါင်လန်ဖူးအထိ ၆၅/၄ မိုင်ကားလမ်း ပေါက်ခဲ့ပြီ။

ကျွန်တော်နှင့် ဆမားဒူးဝါးဆင်ဝါးနောင်ခန်းမ

ကချင်ပြည်နယ်၊ မြစ်ကြီးနားမြို့သို့ စတင်ရောက်ရှိသည့်နေ့မှာပင် ကချင်ပြည်နယ် အစိုးရအဖွဲ့ရုံးသို့ သွားရောက်၍ ဝန်ကြီးချုပ်နှင့်တွေ့ဆုံကာ ဒေသဖွံ့ဖြိုးရေးဆိုင်ရာများ တင်ပြ ဆွေးနွေးခဲ့ပါသည်။ ပြည်ထောင်စုဝန်ကြီး ဦးလှမိုး မှာကြားလိုက်သည့်အတိုင်း စိုက်ပျိုးရေး ကဏ္ဍတွင် ဝါသီးနှံစိုက်ပျိုးရေးကို ထိထိရောက်ရောက် ဆောင်ရွက်နိုင်ရေးအတွက် နည်းလမ်း ရှာဖွေခဲ့ကြသည်။ မြစ်ကြီးနားမြို့မှ ပြန်လည်မထွက်ခွာမီ ဩဂုတ်လ ၄ ရက်နေ့ညတွင် ကျွန်တော်တို့ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ဧည့်သည်အဖွဲ့နှင့် သာသနာရေး နှင့် ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့် အမျိုးသားပြတိုက်ဦးစီးဌာနဧည့်သည် အဖွဲ့တို့ကို ပြည်နယ်ဝန်ကြီးချုပ်က ဆမားဒူးဝါးဆင်ဝါးနောင်ခန်းမ၌ ဂုဏ်ပြုညစာ တည်ခင်း နှုတ်ဆက်ခဲ့ပါသည်။ ပြည်နယ်ဝန်ကြီးချုပ် ဦးခက်ထိန်နန်က အမှာစကားပြောကြားပြီး ဂုဏ်ပြု လက်ဆောင်များ ပေးအပ်ပါသည်။ ကျွန်တော်ရခဲ့သော ဂုဏ်ပြုလက်ဆောင်တွင် ဝန်ကြီးချုပ်ကိုယ်တိုင် ဆင်မြန်းပေးသော ကချင်တိုင်းရင်းသား ရိုးရာဝတ်စုံလည်း ပါဝင်သဖြင့် အထူးပင် ကျေးဇူးတင်လေးစားတန်ဖိုးထားခဲ့ရပါသည်။

ကျေးဇူးတင်စကား ပြန်လည်ပြောကြားခွင့်ရခဲ့၍ ထိုနေ့ညက ဆမားဒူးဝါးဆင်ဝါးနောင် ခန်းမအတွင်းသို့ ရောက်ရှိခြင်းသည် ဒုတိယအကြိမ်မြောက်ဖြစ်ကြောင်း ထည့်သွင်းပြောကြား ခဲ့ပါသည်။ ထိုခန်းမကြီးအတွင်း၊ ထိုနေရာ၊ ထိုစကားပြော စင်မြင့်မှနေ၍ ပထမအကြိမ် စကား ပြောခွင့်ရခဲ့သည့်နေ့ကတော့ ၂၀၁၇ ခုနှစ်၊ ဇန်နဝါရီလ ၈ ရက်နေ့ဖြစ်ပါသည်။ နယ်စပ်ရေးရာ ဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီး ရဲအောင်၏ တာဝန်ပေးချက်အရ ထိုနေ့နံနက်ပိုင်းတွင် တံတားဦးအပြည်ပြည်ဆိုင်ရာလေဆိပ်မှ လေယာဉ်ဖြင့် မြစ်ကြီးနားမြို့ သို့ ထွက်ခွာခဲ့ပြီး မွန်းလွဲ ၁ နာရီအချိန် ဆမားဒူးဝါးဆင်ဝါးနောင်ခန်းမသို့ သွားရောက်ခဲ့ပါ သည်။ ထိုခန်းမကြီးထဲတွင် ကချင်ပြည်နယ်အတွင်းက တိုက်ပွဲရှောင်မိသားစုများအတွက် ထောက်ပံ့လှူဒါန်းရန် အသင့်ဝယ်ယူပေးပို့ထားသော ဆန် ၂၀၁၀ အိတ်၊ ဆီ ၄၀၂၀ ပိဿာ၊ ပဲ ၄၀၂၀ ပိဿာ၊ ဆား ၄၀၂၀ ပိဿာ၊ ခြုံစောင် ၁၀၀၀ ထည် တို့ကို ကချင်ပြည်နယ်အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးသူရမျိုးတင်ထံသို့ လွှဲပြောင်းပေးအပ်ခဲ့ပါ သည်။ ယင်းကဲ့သို့ ထောက်ပံ့ပစ္စည်းများ လှူဒါန်းရခြင်းအကြောင်းရင်းကို ရှင်းလင်းပြောကြား ပြီးနောက် ကျွန်တော်တို့အဖွဲ့သည် မြစ်ကြီးနားမြို့ ဂျာမိုင်ကောင်းရပ်ကွက်တွင် နေရာချထား ပေးသော တိုက်ပွဲရှောင်မိသားစုများနှင့် တွေ့ဆုံကာ ထောက်ပံ့ပစ္စည်းများ ပေးအပ်ခဲ့ပါသည်။ ဤသည်တို့ကား ကျွန်တော်နှင့် ဆမားဒူးဝါးဆင်ဝါးနောင်ခန်းမတို့၏ ရေစက်ဆုံမှု အကြောင်း တရားများပါပေတည်း။

စိမ်း၍ မစိမ်းသော မနောမြေ

ငယ်စဉ်က တစ်ကြိမ်တစ်ခါမျှ မရောက်ခဲ့ဖူးသော မနောမြေ၊ ၂၀၁၂ ခုနှစ်ရောက်တော့မှ နယ်စပ်ရေးရာဝန်ကြီးဌာန၊ နတလဝန်ထမ်းဘဝဖြင့် စတင်ရောက်ဖူးခဲ့သည်။ ယင်းနောက်ပိုင်း တွင်မတော့ နယ်စပ်ဖွံ့ဖြိုးရေးလုပ်ငန်းတာဝန်များဖြင့် ရောက်ရှိခဲ့သလို အခြားသောအကြောင်း အရာအမျိုးမျိုးတို့ဖြင့်လည်း ရောက်ခဲ့ရသည်။ ထိုသို့ရောက်ခဲ့ရာ၌ မချမ်းဘော့မြို့နားက နောင်ခိုင်ဆိုသောရွာလေးမှ နတ်ကျွန်းစေတီသို့ သွားရောက်ဖူးမြော်ရာတွင် သက်မွန်မြင့်ဟု အမည်ရေးထိုးထားသည့် စက်လှေလေးဖြင့် သွားရောက်ခဲ့သည်ကို သတိရမိသည်။ ၂၀၁၈ ခုနှစ် ဧပြီလ ၂၃ ရက်နေ့တွင် မိုးညှင်းဒေသ အင်းတော်ကြီးကန်ဘေးနားက တိုက်ပွဲရှောင် ကျေးရွာများသို့ ဆန်၊ ဆီ၊ ဆား၊ ပဲ ရိက္ခာ ၄ မယ်နှင့် စောင်များ၊ ဆိုလာမီးများ သွားရောက် ထောက်ပံ့ပေးအပ်ခဲ့ပြီးနောက် အင်းတော်ကြီး ရွှေမဉ္ဇူရေလယ်ဘုရား ဖူးမြော်ခဲ့သည်ကိုလည်း အမှတ်ရမိသည်။ ခေါင်လန်ဖူးသို့အသွား မချမ်းဘော၊ ထီးခချောင်း၊ အလန်ဂါးရွာ၊ ထန်ဂါးရွာ တွေကို ဖြတ်ပြီး အူရင်းဂါးရွာမရောက်ခင် ကားလမ်းဘေးမှာ လဲလျောင်းနေတဲ့ အုတ်ဂူလေးနှင့် မှတ်တမ်းတင်ဓာတ်ပုံ ရိုက်ခဲ့ဖူးတာကိုလည်း မမေ့၊ မဇိန်ဒမ်းနန်ရမ်၊ အသက် ၂၄ နှစ် ၁၇-၈-၂၀၀၀တွင် ကွယ်လွန်သည်…ဟု မှတ်တမ်းရေးထိုးထားတာ တွေ့ရသည်။ ကားလမ်းမပေါက်မီ ပင်ပန်းဆင်းရဲစွာ သွားလာကြရင်း ကွယ်လွန်သွားသူတွေထဲက တစ်ဦးဖြစ်ပေသည်။ ပူတာအို-ခေါင်လန်ဖူး ခရီးစဉ်အတွင်းမှာပင် မြန်မာပြည်၏ မြောက်ဘက်အစွန်ဆုံး မြို့လေးဖြစ်သည့် ပန်းနန်းဒင်မြို့လေးရှိရာသို့ ၂ ကြိမ် ရောက်ဖြစ်ခဲ့သေးသည်။ ခေါင်လန်ဖူးအထကမှာ ကျောင်းသား၊ ကျောင်းသူလေးများနှင့် တွေ့ဆုံ၍ တက္ကသိုလ်ဝင်စာမေးပွဲအောင်ချက် မြင့်မား ရေး ဟောပြောခဲ့တာကိုလည်းမမေ့။ သေချာပြန်တွေးကြည့်လိုက်သောအခါ ကချင်ပြည်နယ် ဆိုသည်မှာ ကျွန်တော့်အဖို့ရာ စိမ်း၍ မစိမ်းသော မနောမြေ ဟူ၍သာ………..။