01 Aug,2022

မြစ်ကြီးနား၊ ဩဂုတ် ၁

ယနေ့ခေတ်တွင် ရေပန်းစားလျှက်ရှိသော အင်္ကျီများနှင့် အမျိုးသမီးဝတ်လုံချည်အထည်များပေါ်တွင် ရုပ်ပုံစတစ်ကာဒီဇိုင်းများရိုက်ကူးနည်း၊ ကျောတံဆိပ်များရိုက်ကူးနည်း၊ ပန်းပွင့်ဒီဇိုင်းများ၊ ဂျိဒ်ဒီဇိုင်းများနှင့် ကချင်ရိုးရာဂျိဒ်ဒီဇိုင်းများပြုလုပ်နိုင်စေရန်အတွက် အတတ်ပညာတစ်ခုဖြစ်သည့် အထည်ပန်းပုံရိုက်နှင့်ဆေးရေးနည်းသင်တန်းကို ယနေ့ နံနက်ပိုင်းက ကချင်ပြည်နယ်၊ မြစ်ကြီးနားမြို့ရှိ ရက်ကန်းနှင့်အသက်မွေးပညာသင်တန်းကျောင်း၌ ဖွင့်လှစ်သင်ကြားပေးလျက်ရှိကြောင်း သိရသည်။

သင်တန်းဖွင့်ပွဲသို့ ကချင်ပြည်နယ် အသေးစားစက်မှုလက်မှုလုပ်ငန်းဦးစီးဌာန ညွှန်ကြားရေးမှူး ဦးအောင်မောင်း၊ တိုင်းရင်းသားများအခွင့်အရေးကာကွယ်စောင့်ရှောက်ရေးဦးစီးဌာန ညွှန်ကြားရေးမှူး ဦးတင်မောင်လွင်၊ ဌာနဆိုင်ရာတာဝန်ရှိသူများနှင့် သင်တန်းသား/သူများတက်ရောက်ကြပြီး အခမ်းအနားတွင် ညွှန်ကြားရေးမှူး ဦးအောင်မောင်က အဖွင့်အမှာပြောကြားကာ ညွှန်ကြားရေးမှူး ဦးတင်မောင်လွင်က သင်တန်းသား/သူများကို အဖွင့်အမှာစကား ပြောကြားသည်။

ယခု ဖွင့်လှစ်သော သင်တန်းတွင် ဂျပ်စက္ကူပေါ်တွင် ပွင်ဖတ်များ၊ အပွင့်များရေးဆွဲနည်း၊ ဖလင်ကော်ပြားပေါ်တွင် ဒီဇိုင်းများဖေါက်နည်း၊ ဆေးရောင်စပ်နည်း၊ အထည်ပေါ်တွင် ဆေးရိုက်နည်း၊ တံဆိပ်ရိုက်ရန် ဘောင်ပြုလုပ်နည်း၊ ဘောင်ကူးနည်း၊ တီရှပ် အင်္ကျီပေါ်တွင်ဆေးရိုက်နည်းနှင့် Heat press ဖြင့် ဆေးရိုက်နည်းတို့ကို စာတွေ့၊ လက်တွေ့ သင်ကြားပေးသွားမည်ဖြစ်ကြောင်း သတင်းရရှိသည်။