17 Jul,2024

နေပြည်တော် ဇူလိုင် ၁၇

သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ပြည်ထောင်စုဝန်ကြီးရုံး၊ ရွှေကမ္ဘာ ငွေစုငွေချေး သမဝါယမအသင်းလီမိတက်၏ ၂၀၂၃-၂၀၂၄ ဘဏ္ဍာနှစ် အရပ်ရပ်ဆိုင်ရာအစည်းအဝေးနှင့် ၂၀၂၄-၂၀၂၅ ဘဏ္ဍာနှစ် အမှုဆောင်အသစ်ရွေးချယ်ပွဲကို ယနေ့နံနက်ပိုင်းက အဆိုပါဝန်ကြီးရုံး အစည်း အဝေးခန်းမ၌ ကျင်းပပြုလုပ်သည်။

အစည်းအဝေးတွင် ရွှေကမ္ဘာ ငွေစုငွေချေးသမဝါယမအသင်းလီမိတက် သဘာပတိက အဖွင့် အမှာစကား ပြောကြားသည်။ ဆက်လက်ပြီး သမဝါယမဦးစီးဌာန၊ မြို့နယ်ဦးစီးမှူးက ငွေစုငွေချေး အသင်းဆိုင်ရာ လုပ်ငန်းဆောင်ရွက်ချက်များကို ရှင်းလင်းပြောကြားသည်။ ထို့နောက် ၂၀၂၃-၂၀၂၄ ဘဏ္ဍာနှစ် ဧပြီလမှမတ်လထိ ဒါရိုက်တာအဖွဲ့၏ လုပ်ငန်းအစီရင်ခံစာနှင့် ဘဏ္ဍာရေးရှင်းတမ်းကို အသင်းအတွင်းရေးမှူးကလည်းကောင်း၊ ၂၀၂၃-၂၀၂၄ ဘဏ္ဍာနှစ် ဧပြီလမှမတ်လထိ အသင်း စာရင်းစစ် အစီရင်ခံစာကို အသင်းစာရင်းစစ်တစ်ဦးကလည်းကောင်း  ဖတ်ကြားရှင်းလင်း အတည် ပြုချက် ရယူခဲ့ပြီး အသင်းသားအသင်းသူများက ဝိုင်းဝန်းအကြံပြု ဖြည့်စွက်ဆွေးနွေးကြသည်။

ယင်းနောက် ၂၀၂၄-၂၀၂၅ ဘဏ္ဍာနှစ် အမှုဆောင်အသစ်ရွေးချယ်ပွဲကို ဖွဲ့စည်းရေး ကော်မတီမှ သမဝါယမအသင်း ဥပဒေ၊ နည်းဥပဒေများ၊ လုပ်ထုံးလုပ်နည်းများနှင့်အညီ ဆက်လက် ကျင်းပခဲ့ရာ  ဖွဲ့စည်းရေးကော်မတီဥက္ကဋ္ဌက အတည်ပြုပေးခဲ့သည်။ ထို့နောက် ရွေးချယ်ခံရသော အမှုဆောင်အဖွဲ့ဝင်အသစ်များသည် ကတိသစ္စာခံယူကြကာ အဖွဲ့ဝင်အသစ်များကိုယ်စား ဥက္ကဋ္ဌ အသစ်က မိတ်ဆက်အမှာစကားပြောကြားခဲ့ပြီး ဒါရိုက်တာအဖွဲ့ဝင်များနှင့်အတူ စုပေါင်းမှတ်တမ်း တင် ဓာတ်ပုံရိုက်ကူးခဲ့ကြကြောင်း သတင်းရရှိသည်။