11 Mar,2024

ဒေးဒရဲ မတ် ၁၀

              ဧရာဝတီတိုင်းဒေသကြီး ဖျာပုံခရိုင်၊ ဒေးဒရဲမြို့နယ် ပဆင-ဘုရားချောင်းလမ်း၌ ကျောက်ချောလမ်း ခင်းခြင်း ဆောင်ရွက်ပြီးစီးမှုကို မတ် ၉ ရက် နံနက်ပိုင်းက တာဝန်ရှိသူများ ကွင်းဆင်းစစ်ဆေးခဲ့ကြောင်း သိရသည်။

              ထိုသို့ ကွင်းဆင်းစစ်ဆေးရာတွင် ဖျာပုံခရိုင် ကျေးလက်လမ်းဖွံ့ဖြိုးရေးဦးစီးဌာနမှ လက်‌ထောက် ညွှန်ကြားရေးမှူး(မြို့ပြ) ဒေါ်လင်းနှင့် တာဝန်ရှိသူများက ၂၀၂၃-၂၀၂၄ ဘဏ္ဍာနှစ် ပြည်ထောင်စု ငွေလုံးငွေရင်း ရန်ပုံငွေကျပ် ၂၄၅ သန်းဖြင့် ဒေးဒရဲမြို့နယ် ပဆင-ဘုရားချောင်းလမ်း၌ ကျောက်ချောလမ်းခင်းခြင်း ဆောင်ရွက်ပြီးစီးမှုကို ကြည့်ရှုစစ်ဆေးပြီး တာဝန်ရှိသူများက လုပ်ငန်း‌ဆောင်ရွက်ပြီးစီးမှုကို ရှင်းလင်းပြသရာ လက်ထောက်ညွှန်ကြားရေးမှူး(မြို့ပြ)က လုပ်ငန်းလိုအပ်ချက်များကို ပေါင်းစပ်ညှိနှိုင်းဆောင်ရွက်ပေးခဲ့သည်။

              ဒေးဒရဲမြို့နယ် ပဆင-ဘုရားချောင်းလမ်းတွင် အရှည် ၅ ဒသမ ၇၁၂ ဖာလုံ၊ အကျယ် ၁၄ ပေ၊ အမြင့် ၁၄ လက်မရှိ ‌ကျောက်ချောလမ်းခြင်းလုပ်ငန်းကို ဖျာပုံ ခရိုင် ကျေးလက်လမ်းဖွံ့ဖြိုးရေးဦးစီးဌာနက ကြီးကြပ်၍ ယမင်းဧရာကုမ္ပဏီက ၂၀၂၃ ခုနှစ်စက်တင်ဘာ ၁ ရက်က စတင်ဆောင်ရွက်ခဲ့ရာ ယခုအခါ လုပ်ငန်းများ ရာနှုန်းပြည့် ပြီးစီးပြီ ဖြစ်ကြောင်းသိရသည်။

          အဆိုပါ ကျောက်ချောလမ်းပြီးစီးမှုကြောင့် ဒေသခံပြည်သူများ ရာသီမရွေး သွားလာအသုံးပြုနိုင်ပြီး ကျေးရွာများမှ ထွက်ရှိသော စိုက်ပျိုးရေးထုတ်ကုန်များကို မြို့ပေါ်ဈေးကွက်သို့ လျင်မြန်စွာ တင်ပို့ရောင်းချ နိုင်မည်ဖြစ်ကြောင်း ဖျာပုံခရိုင် ၊ကျေးလက်လမ်းဖွံ့ဖြိုးရေးဦးစီးဌာနမှသိရသည်။

ကျော်စောဦး(မောရှမ်းမြေ)