06 Mar,2024

မကွေး     မတ်      ၆

မကွေးတိုင်းဒေသကြီး၊ မကွေးခရိုင် ကျေး လက်ဒေသဖွံ့ဖြိုးတိုးတက်ရေးဦးစီးဌာနက မကွေးမြို့နယ်၊ ရေငံကျေးရွာနေပြည်သူများ သန့်ရှင်းသောသောက်သုံးရေရရှိရေးအတွက် မြေအောက်ရေတားတမံမှ ရေထုတ်ယူသုံးစွဲနေမှုအခြေအနေကို တာဝန်ရှိသူများက ယနေ့နံနက်ပိုင်းက ကွင်းဆင်းစစ်ဆေးခဲ့ကြောင်း သိရသည်။

ထိုသို့ကွင်းဆင်းစစ်ဆေးရာတွင် မကွေးခရိုင် ကျေးလက်ဒေသဖွံ့ဖြိုးတိုးတက်ရေးဦးစီးဌာန ခရိုင်ဦးစီးမှူး ဦးအောင်ကြီး၊ မကွေးမြို့နယ်ဦးစီးမှူး ဦးမင်းဇော်ဟန် နှင့် အင်ဂျင်နီယာဝန်ထမ်းများသည် ရေငံကျေးရွာသောက်‌သုံး ရေရရှိရေးကော်မတီဝင်များနှင့်အတူ ၂၀၂၃-၂၀၂၄ခု ဘဏ္ဍားရေးနှစ်တွင် နိုင်ငံတော်ထောက်ပံ့ရန်ပုံငွေကျပ် ၈ ဒသမ သုည ၂ သန်းဖြင့် ဆောင်ရွက်ခဲ့သော မြေအောက်ရေတားတမံမှ သောက်သုံးရေထုတ်ယူသုံးစွဲနေမှုအခြေအနေကို ကြည့်ရှုစစ်ဆေးပြီး ခရိုင်ဦးစီးမှူးက ကျေးရွာတာဝန်ရှိသူများနှင့်တွေ့ဆုံ၍ လိုအပ်သည်များ ပေါင်းစပ်ညှိုနှိုင်း ဆောင်ရွက်ခဲ့သည်။

မကွေးမြို့နယ်၊ ရေငံကျေးရွာ၌ အလျား ၄၀ ပေ အနံ ၂ ပေ အမြင့် ၅ ပေ ၆ လက်မရှိသော မြေအောက်ရေ‌တားတမံနှင့် ၇ ပေအကျယ် အနက် ၁၂ ပေ ကွန်ကရစ် ရေစုကန်တည်ဆောက်ခြင်းလုပ်ငန်းများ ဆောင်ရွက်ပေးခဲ့သည့်အတွက် အဆိုပါကျေးရွာရှိ အိမ်ခြေ ၁၆၆ အိမ်၊ လူ ၆၅၂ ဦး နှင့် ကျွဲ နွား တိရစ္ဆာန်များအတွက် သန့်ရှင်းသောသောက်သုံးရေလုံလောက်စွာရရှိပြီး နွေရာသီကာလများတွင် ရေရှားပါးသည့် အခက်အခဲများကို ကုစားနိုင်မည်ဖြစ်ကြောင်း မကွေးမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ သိရသည်။