25 Feb,2024

နေပြည်တော် ဖေဖော်ဝါရီ ၂၅

          သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ဒုတိယဝန်ကြီး ဦးမြင့်စိုးသည် ယနေ့နံနက် ပိုင်းက တာဝန်ရှိသူများလိုက်ပါလျက် ဧရာဝတီတိုင်းဒေသကြီး၊ ဝါးခယ်မမြို့နယ်၊ ကြာဖြူကျေးရွာရှိ ရွှေကြာဖြူ (၁) စိုက်ပျိုးထုတ်လုပ်ရေးသမဝါယမအသင်းမှ အသင်းသားတောင်သူ ဦးဝင်းဗိုလ်၏ နေကြာ၊ မြေပဲစိုက်ခင်းများအနက် ရုရှားသဘာဝမြေဩဇာအသုံးပြု၍ စိုက်ပျိုးထားသော ဆင်းရွှေကြာ-၂ နေကြာမျိုး ၁ ဧက ရိတ်သိမ်းပြီးစီးမှုအခြေအနေအား သွားရောက်ကြည့်ရှုအားပေး ခဲ့သည်။ အဆိုပါ နေကြာစမ်းသပ်စိုက်ခင်းကို ပြီးခဲ့သည့်နှစ် နိုဝင်ဘာလ ၁၆ ရက်နေ့တွင် စိုက်ပျိုးခဲ့ပြီး ယခုနှစ် ဖေဖော်ဝါရီလ ၁၈ ရက်နေ့တွင် ရိတ်သိမ်းခဲ့ရာ တစ်ဧက အစိုအထွက်နှုန်း ၇၂ တင်း၊ အခြောက်အထွက်နှုန်း ၆၈ တင်း ထွက်ရှိခဲ့ကြောင်း၊  ရုရှားသဘာဝမြေဩဇာ အသုံးပြုပုံ နည်းစနစ်မှာ မစိုက်ပျိုးမှီ ၁ ဧက အတွက် မျိုးစေ့များကို မြေဩဇာအရည် ၅၀ CC ဖြင့် နယ်လူးခြင်း၊ အပင် ဖြစ်ထွန်းချိန်တွင် မြေဩဇာအရည် ၃၀ CC ၂ ကြိမ်ကို သတ်မှတ်အချိုးအစားအတိုင်း ရေဖြင့် ရော၍ဖြန်းပေးခြင်း ပြုလုပ်ပြီး ယူရီးယား ၁ အိတ်ခွဲနှင့် ၁၅ ပတ်လည်ကွန်ပေါင်း အိတ်ဝက်ကိုပါ ထည့်သွင်းအသုံးပြုခဲ့ကြောင်း၊ ယင်းကဲ့သို့ အသုံးပြုမှုကြောင့် အပင်ဖြစ်ထွန်းမှု၊ အစေ့အစံအောင်မြင်မှု အထွက်နှုန်းတိုးမှုများ ရရှိခဲ့သည်။

          ဆက်လက်ပြီး ဒုတိယဝန်ကြီးသည် အသင်းသားတောင်သူများ၏ စိုက်ပျိုးရေးနှင့် ဒေသဖွံ့ဖြိုး ရေး တင်ပြချက်များအပေါ် ညှိနှိုင်းပေါင်းစပ် ဆောင်ရွက်ပေးခဲ့ကြောင်း သတင်းရရှိသည်။