16 Feb,2024

နတ်မောက် ဖေဖော်ဝါရီ ၁၅

            မကွေးတိုင်းဒေသကြီး မကွေးခရိုင် နတ်မောက်မြို့နယ် ကျေးလက်လမ်းဖွံ့ဖြိုးရေးဦးစီးဌာနက နတ်မောက်-ပျော်ဘွယ် ကားလမ်းမကြီးမှ ဇလုပ်ကြီးကျေးရွာအဝင်လမ်း ကျောက်ရောမြေခင်းခြင်းလုပ်ငန်း ပြီးစီးမှုကို ဖေဖော်ဝါရီ ၁၄ ရက် နံနက်ပိုင်းက တာဝန်ရှိသူများ ကွင်းဆင်းစစ်ဆေးခဲ့ကြောင်းသိရသည်။

            ထိုသို့ ကွင်းဆင်းစစ်ဆေးရာတွင် နတ်မောက်မြို့နယ် ကျေးလက်လမ်းဖွံ့ဖြိုးရေးဦးစီးဌာန အငယ်တန်းအင်ဂျင်နီယာ-၃ (မြို့ပြ) ဒေါ်ရွှေစင်ဝင်းသူနှင့် တာဝန်ခံအင်ဂျင်နီယာများက သက်ဆိုင်ရာတာဝန်ရှိသူများနှင့် အတူ နတ်မောက်-ပျော်ဘွယ် ကားလမ်းမကြီးမှ ဇလုပ်ကြီးကျေးရွာအဝင်လမ်း ကျောက်ရောမြေခင်းခြင်းလုပ်ငန်း ပြီးစီးမှုကို ကြည့်ရှုစစ်ဆေးပြီး အငယ်တန်းအင်ဂျင်နီယာ-၃ (မြို့ပြ) ဒေါ်ရွှေစင်ဝင်းသူက လိုအပ်သည်များ ဖြည့်စွက်မှာကြားသည်။

             နတ်မောက်-ပျော်ဘွယ် ကားလမ်းမကြီးမှ ဇလုပ်ကြီးကျေးရွာအဝင်လမ်း အရှည် သုံးမိုင် တစ်ဖာလုံ၊ အကျယ် ၁၈ ပေ၊ အမြင့် ရှစ်လက်မ ကျောက်ရောမြေခင်းခြင်းလုပ်ငန်းကို မကွေးတိုင်းဒေသကြီးအစိုးရအဖွဲ့ ငွေလုံးငွေရင်း ရန်ပုံငွေကျပ် ၁၀၅ ဒသမ ၂၂ သန်းဖြင့် Magway S Three ကုမ္ပဏီမှ ၂၀၂၃ ခုနှစ် နိုဝင်ဘာလ ပထမပတ်က စတင်ဆောင်ရွက်ခဲ့ရာ ယခုအခါ လုပ်ငန်းများ ရာနှုန်းပြည့် ပြီးစီးပြီဖြစ်ကြောင်း၊ အဆိုပါလုပ်ငန်းများ ပြီးစီးမှုကြောင့် ကျေးရွာရှိ အိမ်ခြေ ၁၄၃ အိမ်၊ လူဦးရေ ၇၄၃ ဦးတို့အတွက် ရာသီမရွေး လမ်းပန်းဆက်သွယ်ရေးအဆင်ပြေနိုင်မည်ဖြစ်ကြောင်း သိရသည်။

ကျော်ဦး