29 Jun,2022

မော်လမြိုင်၊ ဇွန် ၂၉

၂၀၂၂ ခုနှစ်၊ ဇူလိုင်လ(၂)ရက် စနေနေ့တွင် ကျရောက်မည့် နှစ်(၁၀၀)ပြည့် အပြည်ပြည် ဆိုင်ရာသမဝါယမနေ့အား ဂုဏ်ပြုသောအားဖြင့် မွန်ပြည်နယ်၊ မော်လမြိုင်မြို့၌ ဖွင့်လှစ်လျက်ရှိသည့် သမဝါယမစာရင်းရေးစာရင်းကိုင်သက်မွေးပညာသင်တန်းကျောင်းတွင် သင်တန်းတက်ရောက်လျက်ရှိ သည့် သင်တန်းသား/သူ(၆၅)ဦးအတွက် မွန်ပြည်နယ်အတွင်းရှိ သမဝါယမအသင်းများက စားသောက် စရိတ်ထောက်ပံ့လှူဒါန်းခဲ့ခြင်းအပေါ် ဂုဏ်ပြုမှတ်တမ်းလွှာနှင့် သင်ထောက်ကူပစ္စည်း ပေးအပ်ပွဲအခမ်း အနားကို ယနေ့ နံနက် (၀၈:၃၀) နာရီတွင် သက်မွေးပညာသင်တန်းကျောင်းခန်းမ(ရာမညဆောင်)၌ ကျင်းပခဲ့ရာ မွန်ပြည်နယ်အစိုးရအဖွဲ့ဝင် လမ်းပန်းဆက်သွယ်ရေးဝန်ကြီး၊ ပြည်နယ်အဆင့်ဌာန ဆိုင်ရာတာဝန်ရှိသူများ၊ ပြည်နယ်ဦးစီးမှူးနှင့်ဝန်ထမ်းများ၊ ကျောင်းအုပ်ကြီး၊ အသင်းစုချုပ်ဉက္ကဌ၊ မြို့နယ်သမဝါယမဦးစီးမှူးများ၊ မြို့နယ်သမဝါယမအသင်းစုဉက္ကဋ္ဌများနှင့် သင်တန်းသား/သူများတက် ရောက်ကြသည်။

အခမ်းအနားတွင် ပြည်နယ်အစိုးရအဖွဲ့ဝင် လမ်းပန်းဆက်သွယ်ရေးဝန်ကြီးက အမှာစကား ပြောကြားပြီး သင်တန်းသား / သူများ၏ နေ့စဉ်စားသောက်စရိတ်အတွက် မွန်ပြည်နယ်အတွင်းရှိ ပြည်နယ်အသင်းစုချုပ်၊ မြို့နယ်(၁၀)မြို့နယ်မှ သမဝါယမအသင်းစုများနှင့် အခြေခံအသင်းများမှ ကျပ်(၂၂၅.၃၁)သိန်းအား ပေးအပ်လှူဒါန်းခဲ့ခြင်းအပေါ် ဂုဏ်ပြုမှတ်တမ်းလွှာများအား လမ်းပန်း ဆက်သွယ်ရေးဝန်ကြီးနှင့် ပြည်နယ်အဆင့်ဌာနဆိုင်ရာ တာဝန်ရှိသူများက  ပေးအပ်ရာ  သက်ဆိုင်ရာ အသင်းဉက္ကဌများမှ လက်ခံရယူခဲ့ပါသည်။

ဆက်လက်ပြီး သင်တန်းကျောင်းတွင် တက်ရောက်ပညာသင်ကြားနေသော သင်တန်းသား/ သူများအတွက် သင်ထောက်ကူပစ္စည်းဖြစ်သည့် ငွေကျပ်(၁၄၅၀၀၀/-)တန်ဖိုးရှိ ဘောလ်ပင်၊ စာရင်း ရေးဆွဲရန် စာအုပ်များအား ပြည်နယ်ဦးစီးမှူး ဒေါ်ခင်မာအေးက ပေးအပ်ရာ ကျောင်းသားကိုယ်စား လှယ်များမှ လက်ခံရယူသည်။ ထို့နောက် ကျောင်းအုပ်ကြီးမှ စားသောက်စရိတ်နှင့် သင်ထောက် ကူပစ္စည်းများ လှူဒါန်းခဲ့ခြင်းအပေါ် ကျေးဇူးတင်စကား ပြောကြားသည်။

အဆိုပါ သင်တန်းကျောင်းအား(၁၆-၆-၂၀၂၂)ရက်နေ့တွင် စတင်ဖွင့်လှစ်ခဲ့ပြီး၊ သင်တန်း သား/ သူ(၆၅)ဦး တက်ရောက်လျက်ရှိရာ သင်တန်းကာလမှာ(၂)နှစ်ဖြစ်ပါသည်။ ဤကျောင်းအား ပညာ ဆက်လက်သင်ယူရန် အခက်အခဲရှိသူများကို စာရင်းရေး၊ စာရင်းကိုင်ပညာဖြင့် အသက်မွေးဝမ်းကျောင်း ပြုနိုင်စေရန်နှင့် သင်တန်းသားများအနက် ထူးချွန်သူများကို ရွေးချယ်၍ သမဝါယမကောလိပ်များနှင့် သမဝါယမနှင့် စီမံခန့်ခွဲမှုပညာတက္ကသိုလ်များသို့ ပေါင်းကူး၍ ပညာဆက်လက်သင်ယူနိုင်သည့် အခွင့်အလမ်းများ ဖန်တီးပေးရန် ရည်ရွယ်၍ ဖွင့်လှစ်ခဲ့ခြင်းဖြစ်ကြောင်း သိရသည်။