24 Jan,2024

ကျိုက်လတ် ဇန်နဝါရီ ၂၄

ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနက လတာကြီးကျေးရွာအုပ်စု၊ လတာကြီးကျေးရွာမြစိမ်း​ရောင်​ကျေးရွာ၌ မြစိမ်းရောင်ကျေးရွာစီမံကိန်းလည်ပတ်ရန်ပုံငွေ ဆဌမအကြိမ်အဖြစ်  ငွေကျပ် ၃၅၆သိန်း ထုတ်ချေးခြင်းကို ယနေ့နံနက်ပိုင်းအချိန်က  အဆိုပါကျေးရွာ ဘုန်းကြီးကျောင်း၌  ပြုလုပ်ခဲ့ကြောင်း သိရသည်။

ရှေးဦးစွာ ကျိုက်လတ်မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးသူရရှိန်က ကျေးလက်နေပြည်သူများ၏ ဝင်ငွေလျော့နည်းလာမှုနှင့် စားဝတ်နေရေး အခက်အခဲများကို ကုစားပေးနိုင်ရန်နှင့် လူမှုစီးပွားဘဝများ ဖွံ့ဖြိုးလာစေရန်ရည်ရွယ်၍ မြစိမ်းရောင်ကျေးရွာစီမံကိန်း အရင်းမပျောက်လည်ပတ်ရန်ပုံငွေများ  ထုတ်ချေးပေးရခြင်းဖြစ်ကြောင်း ပြောကြားသည်။

ဆက်လက်၍ မြို့နယ်ဦးစီးမှူး ဦးသူရရှိန်နှင့် စီမံကိန်းတာဝန်ခံဝန်ထမ်းများက လတာကြီးကျေးရွာရှိ မြစိမ်းရောင် ကျေးရွာစီမံကိန်း ရန်ပုံငွေကြီးကြပ်မှုကော်မတီများထံ စီမံကိန်းရန်ပုံငွေကျပ် ၃၅၆သိန်း လွှဲပြောင်းပေးအပ်သည်။

ထို့နောက် မြစိမ်းရောင်ကျေးရွာစီမံကိန်း ရန်ပုံငွေကြီးကြပ်မှုကော်တီဝင်များက လတာကြီးကျေးရွာရှိ စိုက်ပျိုးရေးလုပ်ကိုင်သူ ၆၄ဦးနှင့် မွေးမြူရေးလုပ်ကိုင်သူ   ၈၀ ဦးစုစုပေါင်းအသင်းသားအသင်းသူ ၁၄၄ဦးတို့ကို မြစိမ်းရောင်ကျေးရွာစီမံကိန်း အရင်းမပျောက်လည်ပတ် ရန်ပုံငွေကျပ် ၃၅၆သိန်း ထုတ်ချေးပေးခဲ့ကြောင်းသိရသည်။

အခမ်းအနားသို့ ကျိုက်လတ်မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးသူရရှိန်နှင့် စီမံကိန်း တာဝန်ခံဝန်ထမ်းများ၊ ကျေးရွာရှိ မြစိမ်းရောင်ကျေးရွာစီမံကိန်း ရန်ပုံငွေကြီးကြပ်မှုကော်မတီဝင်များ၊ အသင်းသူ အသင်းသားများ တက်ရောက်ခဲ့ကြောင်းသိရသည်။