18 Jan,2024

မိုင်းရယ် ဇန်နဝါရီ ၁၇

      ရှမ်းပြည်နယ်(မြောက်ပိုင်း) မိုင်းရယ်မြို့နယ် ကျေးလက်လမ်းဖွံ့ဖြိုးရေးဦးစီးဌာနက မန်မိုင်(ခိုင်းယွန်း)-ဟိုက်ပုလမ်း၌ ၂၀၂၃-၂၀၂၄ ဘဏ္ဍာနှစ်တွင်ကျောက်လမ်းခင်းခြင်းလုပ်ငန်းဆောင်ရွက်ပြီးစီးမှုကို ဇန်နဝါရီ ၁၆ ရက်တွင် တာဝန်ရှိသူများ ကွင်းဆင်းစစ်ဆေးခဲ့သည်။

      ထိုသို့ ကွင်းဆင်းစစ်ဆေးရာတွင် ရှမ်းပြည်နယ်(မြောက်ပိုင်း) ကျေးလက်လမ်းဖွံ့ဖြိုးရေးဦးစီးဌာနမှ ညွှန်ကြားရေးမှူး(မြို့ပြ) ဦးကျော်ဇေယျာဝင်းနှင့် တာဝန်ရှိသူများက ၂၀၂၃ - ၂၀၂၄ ဘဏ္ဍာနှစ်တွင် ပြည်ထောင်စုရန်ပုံငွေကျပ် ၁၄၁ ဒသမ ၀၇၃ သန်း၊ ပြည်နယ်ခွင့်ပြု ရန်ပုံငွေကျပ် ၁၇၂ ဒသမ ၉၁၈၅ သန်းဖြင့်ဆောင်ရွက်သည့် မိုင်းရယ်မြို့နယ် မန်မိုင်(ခိုင်းယွန်း)-ဟိုက်ပုလမ်း၌ ကျောက်လမ်းခင်းခြင်းလုပ်ငန်း ဆောင်ရွက်ပြီးစီးမှုကို ကြည့်ရှုစစ်ဆေးပြီး မိုင်းရယ်မြို့နယ်ကျေးလက်လမ်းဖွံ့ဖြိုးရေးဦးစီးဌာန ဦးစီးအရာရှိ (မြို့ပြ) ဦးညွန့်မင်းသူက လုပ်ငန်းဆောင်ရွက်ပြီးစီးမှုကိုလိုက်လံရှင်းလင်းပြသရာ ညွှန်ကြားရေးမှူး(မြို့ပြ)က လုပ်ငန်းလိုအပ်ချက်များကို ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

     မိုင်းရယ်မြို့နယ် မန်မိုင် (ခိုင်းယွန်း)-ဟိုက်ပုလမ်း၌ အရှည် တစ်မိုင် ငါးဖာလုံ၊ အကျယ် ၁၆ ပေ၊ အမြင့် ခြောက်လက်မရှိ ကျောက်လမ်းခင်းခြင်းလုပ်ငန်းကို မောဝ်ချယ်ရီကုမ္ပဏီနှင့် မိုင်းရယ်မြို့နယ် ကျေးလက်လမ်းဖွံ့ဖြိုးရေးဦးစီးဌာနက ၂၀၂၃ ခုနှစ် ဇူလိုင်လ ပထမပတ်က စတင်ဆောင်ရွက်ခဲ့ရာ ယခုအခါ လုပ်ငန်းများရာနှုန်းပြည့်ပြီးစီးပြီဖြစ်ကြောင်း သိရသည်။

ကျော်ဇောဦး(မောရှမ်းမြေ)