08 Jan,2024

ရေနံချောင်း   ဇန်နဝါရီ   ၈

          မကွေးတိုင်းဒေသကြီး၊ ချောက်ခရိုင်၊ ရေနံချောင်းမြို့နယ် ကျေးလက်ဒေသဖွံဖြိုးတိုးတက်ရေး ဦးစီးဌာနက ကျေးရွာဖွံ့ဖြိုးတိုးတက်ရေးလုပ်ငန်းစီမံကိန်း(VDP)ဖြင့် ညောင်ပင်အိုင့်ကျေးရွာအုပ်စု၊ ဆင်သေမြောက်ကျေးရွာ၌ ဆိုလာစနစ်တပ်ဆင်ခြင်းလုပ်ငန်း ဆောင်ရွက်ပြီးစီးမှု အခြေအနေများကို ဇန်နဝါရီ ၆ရက် နံနက်ပိုင်းက တာဝန်ရှိသူများ ကွင်းဆင်းစစ်ဆေးခဲ့ကြောင်း သိရသည်။

ထိုသို့ ကွင်းဆင်းစစ်ဆေးရာတွင် ချောက်ခရိုင် ကျေးလက်ဒေသဖွံ့ဖြိုးတိုးတက်ရေးဦးစီးဌာန ခရိုင်ဦးစီးမှူး ဒေါ်မေသက်နိုင်၊ ရေနံချောင်းမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးအေးထွန်းမင်းနှင့် အင်ဂျင်နီယာဝန်ထမ်းများက ကျေးရွာဖွံ့ဖြိုးရေးကော်မတီဝင် များနှင့်အတူ ဆင်သေမြောက်ကျေးရွာ၌  ဆိုလာရေတင်စနစ်ဖြင့် သောက်သုံးရေရရှိရေးလုပ်ငန်း ဆောင်ရွက်ပြီးစီးမှုအခြေအနေများကို ကြည့်ရှုစစ်ဆေးပြီး ခရိုင်ဦးစီးမှူးက ဆောင်ရွက်ပြီး လုပ်ငန်း များ ရေရှည်တည်တံ့အောင် ဝိုင်းဝန်း စောင့်ရှောက်ကြရန် မှာကြားသည်။

ဆင်သေမြောက်ကျေးရွာ၌  သောက်သုံးရေရရှိရေးအတွက် ၇ ဒသမ ၁၅ ကီလိုဝပ် ဆိုလာစနစ်တပ်ဆင်ခြင်းလုပ်ငန်းကို ၂၀၂၃-၂၀၂၄ ဘဏ္ဍာနှစ်၊ ကျေးရွာဖွံ့ဖြိုးတိုးတက်ရေး လုပ်ငန်း စီမံကိန်းရန်ပုံငွေကျပ် သိန်း ၁၅၀၊ ကျေးရွာပြည်သူ ထည့်ဝင်ငွေကျပ် ၁၉ ဒသမ ၅သိန်း ၊ စုစုပေါင်း ငွေကျပ် ၁၆၉ ဒသမ ၅သိန်း အသုံးပြု၍ ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ နည်းပညာ ပံ့ပိုးမှုဖြင့် ကျေးရွာသူ၊ ကျေးရွာသားများ ကိုယ်တိုင် ယခုနှစ် စက်တင်ဘာ စတုတ္ထပတ်က စတင် ဆောင်ရွက်ခဲ့ရာ ယခုအခါ လုပ်ငန်းများရာနှုန်းပြည့်ပြီးစီးပြီဖြစ်ကြောင်း၊အဆိုပါ လုပ်ငန်းပြီးစီးသဖြင့် ကျေးရွာရှိ အိမ်ခြေ ၆၃အိမ်၊ လူ ၂၈၅ဦးတို့ ကုန်ကျစရိတ်သက်သာစွာ ရာသီမရွေး သောက်သုံးရေ ရရှိနေပြီဖြစ်ကြောင်း သိရသည်။