03 Jan,2024

ကံမ   ဇန်နဝါရီ   ၃

          မကွေးတိုင်းဒေသကြီး၊ သရက်ခရိုင်၊ ကံမမြို့နယ် ကျေးလက်ဒေသဖွံ့ဖြိုးတိုးတက်ရေး ဦးစီး ဌာနက ကျေးလက်နေပြည်သူများ အလုပ်အကိုင်အခွင့်အလမ်းနှင့် မိသားစုဝင်ငွေ တိုးပွားလာပြီး ဆင်းရဲမှုလျော့ကျစေရန် ရည်ရွယ်၍ အလယ်ချောင်းကျေးရွာအုပ်စု၊ အလယ်ချောင်းကျေးရွာတွင် စတုတ္ထအကြိမ် မြစိမ်းရောင်ကျေးရွာ စီမံကိန်းအရင်းမပျောက် လည်ပတ်ရန်ပုံငွေထုတ်ချေးခြင်းကို ဇန်နဝါရီ ၂ ရက် နံနက်ပိုင်းက အဆိုပါကျေးရွာ ဘုန်းတော်ကြီးကျောင်း၌ ကျင်းပပြုလုပ်ခဲ့ကြောင်း သိရသည်။

          ရှေးဦးစွာ ကံမမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန ဦးစီးအရာရှိ ဦးမင်းကိုနိုင်က မြစိမ်းရောင်ကျေးရွာစီမံကိန်းရန်ပုံငွေ ထုတ်ချေးပေးရခြင်း၏ ရည်ရွယ်ချက်၊ အကျိုး ကျေးဇူးများ၊ စီမံကိန်းအကြောင်းအရာများ၊ မြစိမ်းရောင်စီမံကိန်း လက်စွဲစာစောင်ပါ သတ်မှတ် စည်းမျဉ်းစည်းကမ်းများ၊ ငွေထုတ်ချေးရာတွင် လိုက်နာရမည့် စည်းကမ်းသတ်မှတ်ချက်များကို  ရှင်းလင်းပြောကြားပြီး အလယ်ချောင်းကျေးရွာ မြစိမ်းရောင်ကျေးရွာစီမံကိန်းလုပ်ငန်းအဖွဲ့ဝင်များ ထံ ရန်ပုံငွေကျပ် ၃၈ ဒသမ ၁၈သန်း လွှဲပြောင်းပေးအပ်သည်။

          ထို့နောက် မြစိမ်းရောင်ကျေးရွာစီမံကိန်းလုပ်ငန်းအဖွဲ့ဝင်များက အလယ်ချောင်းကျေးရွာရှိ စိုက်ပျိုးရေး လုပ်ကိုင်သူ ၂၀၅ ဦးကို ငွေကျပ် ၃၆ ဒသမ ၇၄သန်း၊ အရောင်းအဝယ်လုပ်ကိုင်သူ ရှစ်ဦးကို ငွေကျပ် ၁ ဒသမ ၄၄သန်း၊ စုစုပေါင်း အသင်းသား၊ အသင်းသူ ၂၁၃ဦးကို စတုတ္ထအကြိမ် အဖြစ် မြစိမ်းရောင်ကျေးရွာ စီမံကိန်းအရင်းမပျောက်လည်ပတ်ရန်ပုံငွေကျပ် ၃၈ ဒသမ ၁၈သန်း ထုတ်ချေးပေးခဲ့ကြောင်း သိရသည်။