29 Dec,2023

ဗန်းမော် ဒီဇင်ဘာ ၂၉

          ကချင်ပြည်နယ်၊ ဗန်းမော်မြို့နယ် မြောက်ပိုင်းရော်ဘာစိုက်ပျိုးထုတ်လုပ်ရေးသမဝါယမအသင်း လီမိတက်သည် နိုင်ငံ့စီးပွားမြှင့်တင်ရေးရန်ပုံငွေမှ မတည်ထောက်ပံ့ငွေဖြင့် မန်စီမြို့နယ်၊ ကုန်းတိမ် ကျေးရွာတွင် စက်ရုံတည်နေရာထား၍ ရော်ဘာပြားများထုတ်လုပ်လျက်ရှိသည်။

          ရော်ဘာစေးများအား ကုန်းတိမ်ကျေးရွာနှင့် အနီးအနားကျေးရွာများရှိ ရော်ဘာစိုက်ပျိုးသူများ ထံမှ ဝယ်ယူပြီး ဖော်မင်းအက်ဆစ်နှင့် ရော်ဘာစေးများအား အချိုးကျရော၍ ခဲထားခြင်း၊ ကြိတ်ခြင်းများ ပြုလုပ်သည်။ ထို့နောက် ကြိတ်ပြီးသောရော်ဘာပြားများအား ၃ ရက်နေလှန်းပြီး ၄ ရက်မှိုင်းခံခြင်းများ ဆောင်ရွက်ရာ တစ်ရက်လျှင် ရော်ဘာပေါင် (၂၂၀) မှ (၂၃၅) ကြားနှုန်းဖြင့် တစ်လလျှင် ၆၅၀၀ ပေါင်မှ ၇၀၀၀ ကြားထုတ်လုပ်နိုင်ပြီး တစ်ထုပ်လျှင် ၁၁၀ ပေါင်နှုန်းဖြင့် ၆၅ ထုပ်မှ ၇၀ ထုပ်ကြားရရှိသည်။ ထွက်ရှိလာသော ရော်ဘာပြားများအား ပြည်တွင်းသာမက ပြည်ပထိဖြန့်ဖြူးရောင်းချလျက်ရှိကြောင်း သိရသည်။