19 Dec,2023

တောင်ကြီး ဒီဇင်ဘာ ၁၉

          ရှမ်းပြည်နယ်(တောင်ပိုင်း) ညောင်ရွှေမြို့နယ်၊ မိုင်းပျိုးကျေးရွာအုပ်စု၊ ကျေးထပ်ကျေးရွာရှိ မြပုလဲစိုက်ပျိုးရေးနှင့် အထွေထွေစီးပွားရေးလုပ်ငန်းသမဝါယမအသင်း၏ အသင်းသား ၄၃ ဦးပိုင် လယ်ယာမြေဧက ၂၇၂ ဧကတွင် ရွှေရင်အေးစပါးရိတ်သိမ်းချွေလှေ့ခြင်းကို ကျင်းပပြုလုပ်ခဲ့ရာ မြို့နယ်သမဝါယမဦးစီးဌာန ဦးစီးအရာရှိ၊ မြို့နယ်သမဝါယမအသင်းစုဥက္ကဋ္ဌနှင့် တာဝန်ရှိသူတို့က ကွင်းဆင်းကြည့်ရှုခဲ့သည်။

          အဆိုပါ မြပုလဲစိုက်ပျိုးရေးနှင့်အထွေထွေစီးပွားရေးလုပ်ငန်းသမဝါယမအသင်းသို့ ညောင်ရွှေ မြို့နယ်သမဝါယမအသင်းစုမှ တစ်ဧကလျှင် စိုက်ပျိုးရေးသွင်းအားစု နှစ်သိန်းနှုန်းနှင့်ညီမျှသော သွင်းအားစုများ တန်ဖိုးငွေကျပ် ၅၄၄ သိန်း ထောက်ပံ့ပေးခဲ့ပြီး တစ်ဧကလျှင်စပါးတင်း ၉၀ နှုန်း ထွက်ရှိခဲ့ကြောင်း သိရသည်။