04 Dec,2023

ချမ်းမြသာစည် ဒီဇင်ဘာ ၂

မန္တလေးတိုင်းဒေသကြီး၊ ချမ်းမြသာစည်မြို့နယ်၊ ဓနသုခငွေစုငွေချေးသမဝါယမအသင်း၏ အသင်းစုသစ်ဖွဲ့စည်းခြင်း၊ ဒါရိုက်တာအဖွဲ့နှင့်အမှုဆောင်များ ရွေးချယ်တင်မြှောက်ပွဲကို ယမန်နေ့နံနက် ၁၀ နာရီက ထီးတန်းရပ်ကွက် သမဝါယမအသင်းစုရုံးအစည်းအဝေးခန်းမ၌ ကျင်းပခဲ့သည်။

အဆိုပါ အသင်းစုသစ်ဖွဲ့စည်းခြင်းအခမ်းအနားတွင် သဘာပတိ မြို့နယ်သမဝါယမဦးစီးဌာန ဦးစီးအရာရှိ ဒေါ်ဖြူသဲနွယ်က အဖွင့်အမှာစကားပြောကြားပြီးနောက်  မြို့နယ်သမဝါယမအသင်းစုဥက္ကဋ္ဌ ဦးချစ်ခင်က အမှာစကားပြောကြားခဲ့သည်။ ထို့နောက် အသစ်ဖွဲ့စည်းမည့် ဓနသုခငွေစုငွေချေး သမဝါယမအသင်း၏ ဒါရိုက်တာအဖွဲ့နှင့် အသင်းသားစာရင်းစစ်အမည်စာရင်းတို့ကို အသင်းသားတစ်ဦး က အဆိုပြုတင်သွင်း၍ အသင်းသားနှစ်ဦးက ထောက်ခံတင်ပြခဲ့ကြသည်။ ဆက်လက်ပြီး အဆိုပြု တင်သွင်းထောက်ခံခြင်းအပေါ် သဘာပတိမှ အသင်းသားများ၏ သဘောထားရယူ၍ အတည်ပြုခဲ့ ကြောင်း သိရသည်။ ဆက်လက်ပြီး ရွေးချယ်ထားသော ဒါရိုက်တာအဖွဲ့နှင့် အသင်းစာရင်းစစ်တို့က သဘာပတိရှေ့မှောက်တွင် ကတိသစ္စာခံယူခဲ့ကြပြီးနောက် အသင်းဥက္ကဋ္ဌအသစ်မှ မိတ်ဆက်စကား ပြောကြားခဲ့သည်။ ထို့နောက်သဘာပတိက နိဂုံးချုပ်အမှာစကားပြောကြားကာ အသင်းစုအသစ် ဖွဲ့စည်းခြင်းအခမ်းအနားကို အောင်မြင်စွာ ကျင်းပပြုလုပ်ခဲ့ကြောင်း သိရသည်။

ချမ်းမြေ့

မန္တလေးတိုင်းဒေသကြီး