25 Oct,2023

ပုဏ္ဏားကျွန်း အောက်တိုဘာ ၂၄

ရခိုင်ပြည်နယ်၊ ပုဏ္ဏားကျွန်းမြို့၌ နိုင်ငံ့စီးပွားမြှင့်တင်ရန်ပုံငွေဖြင့် ရယူဆောင်ရွက်မည့် အခြေခံသမဝါယမအသင်းသားတောင်သူများအား သွင်းအားစုစရိတ် ထောက်ပံ့ပေးအပ်ပွဲကို ယမန်နေ့မွန်းလွဲ(၂)နာရီက ပုဏ္ဏားကျွန်းမြို့နယ် သမဝါယမဦးစီးဌာနရုံး အစည်းအဝေးခန်းမတွင် ကျင်းပခဲ့သည်။

ရှေးဦးစွာ မြို့နယ်အုပ်ချုပ်ရေးမှူး၊ မြို့နယ်အဆင့်စီမံကိန်းကြီးကြပ်မှုကော်မတီဥက္က ဦးမောင်စံဝင်းက အဖွင့်အမှာစကားပြောကြားပြီး၊  မြို့နယ်သမဝါယမဦးစီးဌာနမှ မြို့နယ်ဦးစီးမှူး ဦးဌေးဇော်အောင်က အရင်းမပျောက်နိုင်ငံ့စီးပွားမြှင့်တင်ရန်ပုံငွေဖြင့် အကောင်အထည်ဖော် ဆောင်ရွက်မည့်စီမံကိန်းကိစ္စနှင့် ပတ်သက်၍ ရှင်းလင်းပြောကြားခဲ့သည်။

ထို့နောက် သမဝါယမကဏ္ဍ နိုင်ငံ့စီးပွားမြှင့်တင်ရန်ပုံငွေဖြင့် သွင်းအားစုစိုက်ပျိုးမည့် အခြေခံသမဝါယမအသင်း(၆)သင်းသို့ စီမံကိန်းကြီးကြပ်မှုကော်မတီဥက္ကနှင့်အဖွဲ့ဝင်များက သွင်းအားစုမတည်ရန်ပုံငွေများအား ထောက်ပံ့ပေးအပ်ခဲ့ကြသည်။

အဆိုပါရန်ပုံငွေများလွှဲပြောင်းပေးအပ်ရာတွင် နာရီကန်ကျေးရွာ ရှေ့ဆောင်သမဝါယမ အသင်း၊ နတ်ဆိပ်ကျေးရွာ ရွှေဝါရောင်သမဝါယမအသင်း၊ တန်းစွယ်ကျေးရွာ မြတ်စွယ်တော် သမဝါယမအသင်း၊ သဲတက်ကျေးရွာ ဂစ္ဆပရွှေဝါသမဝါယမအသင်း၊ င/ပြောက်ဆည်ကျေးရွာ မြရတနာသမဝါယမအသင်းနှင့်ကွန်းတောင်ကျေးရွာ ရွှေမြေသမဝါယမအသင်းများသို့ နိုင်ငံ့စီးပွား မြှင့်တင်ရေးရန်ပုံငွေမှ အရင်းမပျောက် မတည်ရန်ပုံငွေကျပ်သန်း ၁၀၀ တိတိကို လွှဲပြောင်း ပေးအပ်ခဲ့ကြောင်း မြို့နယ်သမဝါယမဦးစီးဌာနမှ သိရသည်။    

နီထွန်းအောင်(ပြန်/ဆက်)

ရခိုင်ပြည်နယ်