19 Oct,2023

မြိတ် အောက်တိုဘာ ၁၈

တနင်္သာရီတိုင်း‌ဒေသကြီး၊ မြိတ်မြို့နယ်တွင် ၂၀၂၃-၂၀၂၄ ဘဏ္ဍာရေးနှစ် အသင်းသားတောင်သူ များအတွက် မိုးစပါးစိုက်ပျိုးရေး(မြစိမ်းရောင်)စီမံကိန်းမတည်ငွေ(သွင်းအားစု)ပေးအပ်ပွဲ အခမ်းအနား ကို မြို့နယ်သမဝါယမဦးစီးဌာနအစည်းအဝေးခန်းမ၌ ကျင်းပပြုလုပ်ခဲ့သည်။ အခမ်းအနားသို့ တိုင်းအဆင့်/ခရိုင်အဆင့်/မြို့နယ်အဆင့် ချေးငွေကြီးကြပ်ရေးကော်မတီအဖွဲ့ဝင်များ၊ တိုင်းဒေသကြီး သမဝါယမဦးစီးဌာနမှ လက်ထောက်ညွှန်ကြားရေးမှူး၊ မြို့နယ်သမဝါယမဦးစီးဌာနမှ ဦးစီးအရာရှိနှင့် ဝန်ထမ်းများ၊ အသင်းသားတောင်သူများတက်ရောက်ခဲ့သည်။

အဆိုပါ ပေးအပ်ပွဲတွင် တိုင်းဒေသကြီးသမဝါယမဦးစီးဌာနမှ လက်ထောက်ညွှန်ကြားရေးမှူး ဦးဇော်မင်းဆွေက ပံ့ပိုးငွေပေးအပ်ရခြင်းအကြောင်း ရှင်းလင်းအမှာစကားပြောကြားခြင်း၊ အသင်းသား တောင်သူများသို့  သွင်းအားစုများထောက်ပံ့ပေးအပ်ခြင်း၊ မြိတ်ခရိုင်ကျေးရွာစီမံကိန်းကြီးကြပ်မှုကော်မတီ အတွင်းရေးမှူး ခရိုင်ဒုတိယအုပ်ချုပ်ရေးမှူး ဦးမြင့်ဆွေက လိုအပ်သည်များ လမ်းညွှန်အမှာစကား ပြောကြားခဲ့သည်။

ဆက်လက်၍ မိုးစပါးစိုက်ပျိုးရေးစီမံကိန်းမြစိမ်းရောင်(သမဝါယမကဏ္ဍ)မှ မြိတ်မြို့နယ်၊ သစ်ယာဝ ကျေးရွာအုပ်စုရှိ အသင်းသားတောင်သူ ၉၁ ဦးသို့ စိုက်ဧက ၁၅၄၀ အတွက် တစ်ဧကလျှင် နှစ်သိန်း နှုန်းနှင့်ညီမျှသည့် သွင်းအားစုများကို ပံ့ပိုးပေးခဲ့သည်။ အဆိုပါပံ့ပိုးငွေကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန နိုင်ငံ့စီးပွားမြှင့်တင်ရေးရန်ပုံငွေမှ ငွေကျပ် ၃၀၈ သန်းဖြင့် ဆောင်ရွက်ခဲ့ ကြောင်း သိရသည်။