13 Sep,2023

ပျော်ဘွယ်      စက်တင်ဘာ        ၁၃

မန္တလေးတိုင်းဒေသကြီး၊ ရမည်းသင်းခရိုင် ကျေးလက်ဒေသဖွံ့ဖြိုးတိုးတက်ရေးဦးစီးဌာနက ပျော်ဘွယ်မြို့နယ်အတွင်းရှိ ကျေးရွာ ၄ ရွာ၌ မြစိမ်းရောင်စီမံကိန်းအတိုးရငွေဖြင့် ကျေးရွာတွင်းလမ်းကွန်ကရစ်ခင်းခြင်းလုပ်ငန်းများ ဆောင်ရွက်‌ထားရှိမှုအ‌ခြေအနေ ကို တာဝန်ရှိသူများက ယနေ့ နံနက်ပိုင်းက ကွင်းဆင်းစစ်ဆေးခဲ့ကြောင်း သိရသည်။

ထိုသို့ကွင်းဆင်းစစ်ဆေးရာတွင် ရမည်းသင်းခရိုင် ကျေးလက်ဒေသဖွံ့ဖြိုးတိုးတက်ရေးဦးစီးဌာန ခရိုင်ဦးစီးမှူး နှင့် ပျော်ဘွယ်မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဝန်ထမ်းများသည် သက်ဆိုင်ရာကျေးရွာ မြစိမ်းရောင်စီမံကိန်းလုပ်ငန်းအဖွဲ့ဝင်များနှင့်အတူ အုပ်ဆပွင်ကျေးရွာတွင်းလမ်းအရှည် ၆၅၈ ပေ၊ အေးသန်းကုန်းကျေးရွာတွင်းလမ်းအရှည် ၆၃၀ ပေ၊ သပြေရိုးကျေးရွာတွင်းလမ်းအရှည် ၅၃၀ ပေ၊ ကြက်တည်ကျေးရွာတွင်းလမ်းအရှည် ၃၃၄ ပေ ကွန်ကရစ်ခင်းခြင်းလုပ်ငန်းဆောင်ရွက်ပြီးစီးမှုအခြေအနေနှင့် မြစိမ်းရောင်ကျေးရွာစီမံကိန်းရန်ပုံငွေများဖြင့် တပိုင်တနိုင် မိသားစုကိုယ်ပိုင်စီးပွားရေးလုပ်ငန်းများ ဆောင်ရွက်နေမှုအခြေအနေများကို ကြည့်ရှုစစ်ဆေးပြီး ခရိုင်ဦးစီးမှူးက သက်ဆိုင်ရာကျေးရွာမြစိမ်းရောင်စီမံကိန်းလုပ်ငန်းအဖွဲ့ဝင်များနှင့်တွေ့ဆုံ၍ လိုအပ်သည်များ ပေါင်းစပ်ညှိနှိုင်း ဆောင်ရွက်ခဲ့ကြောင်း သိရသည်။

ပျော်ဘွယ်မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနက အုပ်ဆပွင်ကျေးရွာ၊ အေးသန်းကုန်ကျေးရွာ၊ သပြေရိုးကျေးရွာနှင့် ကြက်တည်ကျေးရွာတို့၌ မြစိမ်းရောင်စီမံကိန်းအတိုးရငွေမှ သုံးစွဲခွင့်ရရှိသော စုစုပေါင်း ငွေကျပ် ၄၈ ဒသမ ၅ သန်းနှင့် ပြည်သူထည့်ဝင်များဖြင့် ကျေးရွာတွင်းလမ်းကွန်ကရစ်ခင်းခြင်းလုပ်ငန်းများ ဆောင်ရွက်ခဲ့သည့်အတွက် အဆိုပါကျေးရွာ ၄ ရွာရှိ အိမ်ခြေ ၇၉၉ အိမ်၊ လူ ၃၃၉၉ ဦးအတွက် စီးပွားရေး၊ ပညာရေး၊ ကျန်းမာရေးနှင့် အခြားလူမှုရေးကိစ္စများ ဆောင်ရွက်ရာ၌ ရာသီမရွေးသွားလာနိုင်ပြီ၍ ကျေးလက်နေပြည်သူများ၏ လူမှုစီးပွားဘဝ ဖွံ့ဖြိုးတိုးတက်လာမည်ဖြစ်ကြောင်း ရမည်းသင်းခရိုင် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ သိရသည်။