25 Aug,2023

မုဒုံ၊  သြဂုတ်   ၂၅

မွန်ပြည်နယ် မုဒုံမြို့နယ်တွင် ၂၀၂၃-၂၀၂၄ ဘဏ္ဍာရေးနှစ် ပညာရေးမိသားစုငွေစုငွေချေး သမဝါယမအသင်းလီမိတက် နှစ်ပတ်လည်အရပ်ရပ်ဆိုင်ရာအစည်းအဝေးကို ဩဂုတ်လ ၂၄ ရက်က အမှတ်(၁)အခြေခံပညာအထက်တန်းကျောင်းရှိ ရှင်အရဟံခန်းမ၌ ကျင်းပသည်။ ရှေးဦးစွာ အသင်း ဥက္ကဋ္ဌ ဦးဘတင်က အဖွင့်အမှာစကားပြောကြားပြီး မုဒုံမြို့နယ် သမဝါယမဦးစီးဌာနမှ ဦးစီးအရာရှိ ဦးညီညီထွန်းက သမဝါယမအသင်း၏လုပ်ငန်းစဉ်(၃)ရပ်၊ အသင်းသူ/သားများ၏ လူမှုရေး၊ ပညာရေး ဆိုင်ရာကိစ္စရပ်များနှင့် ရေရှည်တံ့တည်ဖွံ့ဖြိုးစေရန် လမ်းညွှန်အမှာစကားပြောကြားခဲ့သည်။

ထို့နောက် တာဝန်ရှိသူများက အသင်းအမှုဆောင်အဖွဲ့၏ အစီရင်ခံစာ၊ အသင်း၏ဘဏ္ဍာရေး ရှင်းတမ်း၊ အမြတ်ခွဲဝေပုံစာရင်းများ၊ အသင်း၏ရှေ့လုပ်ငန်းစဉ်များတင်ပြခြင်း၊ အသင်းသားများ၏ စုဆောင်းငွေအပေါ် အတိုးနှင့်အကျိုးဝေစုများအားထုတ်ပေးခြင်း၊ ဆွေးနွေးအတည်ပြုခြင်းတို့ကို ဆောင်ရွက်ပေးခဲ့သည်။ အဆိုပါ ပညာရေးမိသားစုငွေစုငွေချေးသမဝါယမအသင်းကို မြို့နယ်အခြေခံ ပညာဦးစီးဌာနဝန်ထမ်းများဖြင့် (၁၉၉၄)ခုနှစ်မှစတင်ဖွဲ့စည်းခဲ့ပြီး လက်ရှိအချိန်တွင် အသင်းသား (၇၁၈)ဦးဖြင့် လည်ပတ်လျက်ရှိကြောင်း သိရသည်။

မော်လမြိုင်သတင်းဌာနခွဲ