21 Aug,2023

ချောက် ဩဂုတ် ၁၈

      မကွေးတိုင်းဒေသကြီး ချောက်မြို့နယ် ကျေးလက်လမ်းဖွံ့ဖြိုးရေးဦးစီးဌာနက ချောက်မြို့နယ်တွင် ကျေးရွာချင်းဆက်လမ်း မြေနီလမ်းဖောက်လုပ်နေမှု အခြေအနေကို ဩဂုတ် ၁၇ ရက် နံနက်ပိုင်းက တာဝန်ရှိသူများ ကွင်းဆင်းစစ်ဆေးခဲ့ကြောင်းသိရသည်။

     ထိုသို့ ကွင်းဆင်းစစ်ဆေးရာတွင် ချောက်မြို့နယ် ကျေးလက်လမ်းဖွံ့ဖြိုးရေးဦးစီးဌာန ဦးစီးအရာရှိ (မြို့ပြ) ဦးဇော်မင်းထွဋ်နှင့် တင်ဒါအောင်မြင်သည့် K Z EN ကုမ္ပဏီမှ တာဝန်ရှိသူများက ၂၀၂၃ - ၂ဝ၂၄ ဘဏ္ဍာနှစ်တွင် တိုင်းဒေသကြီးခွင့်ပြုရန်ပုံငွေ ကျပ် ၁၇ ဒသမ ၅ သန်းဖြင့် ကတိုင်(တ)-ညောင်ပင်စမ်း ကျေးရွာချင်းဆက် မြေနီလမ်းဖောက်လုပ်နေမှုကို ကွင်းဆင်းစစ်ဆေးပြီး ဦးစီးအရာရှိ (မြို့ပြ)ဦးဇော်မင်းထွဋ်က တာဝန်ရှိသူများကို လုပ်ငန်းများ အချိန်မီပြီးစီးနိုင်ရေး အလေးထားဆောင်ရွက်ကြစေလိုကြောင်း ဆွေးနွေးမှာကြားသည်။

       ချောက်မြို့နယ် ကတိုင်(တ)- ညောင်ပင်စမ်း ကျေးရွာချင်းဆက်လမ်း အရှည်ပေ ၂ မိုင် ၁ ဖာလုံ၊ အကျယ် ၁၈ ပေ၊ အမြင့် ရှစ် လက်မရှိ ကျေးရွာချင်းဆက်လမ်း ကို K Z EN ကုမ္ပဏီက တာဝန်ယူ၍ ၂၀၂၃ ခုနှစ် ဩဂုတ်လ ပထမ ပတ်မှ စတင်ဆောင်ရွက်ခဲ့ရာ ယခုအခါ လုပ်ငန်းများ ၉၀ ရာခိုင်နှုန်းခန့် ဆောင်ရွက်ပြီးစီးနေပြီဖြစ်သည်။

      အဆိုပါလုပ်ငန်းများ ဆောင်ရွက်ပြီးစီးမှုကြောင့် ကတိုင်(တ)- ညောင်ပင်စမ်း ကျေးရွာချင်းဆက်လမ်းပေါ်ရှိ ကျေးရွာ လေးရွာမှ အိမ် ခြေ ၁၁၅၀၊ လူဦးရေ ၄ဝဝဝ တို့ အဆင်ပြေလွယ်ကူစွာဖြင့် သွားလာနိုင်မည်ဖြစ်ရာ ဒေသခံပြည်သူများ၏ ဒေသထွက်ကုန်ပစ္စည်းများကို သယ်ယူစရိတ်သက်သာစွာဖြင့် ရောင်းချနိုင်တော့မည်ဖြစ်ပြီး လူမှုရေး၊ ကျန်းမာရေးနှင့် အသက်မွေးဝမ်းကျောင်း လုပ်ငန်းများအတွက် အကျိုးပြုသွားမည်ဖြစ်ကြောင်း ချောက်မြို့နယ် ကျေးလက်လမ်းဖွံ့ဖြိုးရေးဦးစီးဌာန ဦးစီးအရာရှိ (မြို့ပြ) ဦးဇော်မင်းထွဋ်ထံမှသိရသည်။

နွဲ့ယဉ်