11 Jul,2023

၂၀၂၃ ခုနှစ်၊ ဇူလိုင်လ ၁၁ ရက်

              အသေးစားစက်မှုလက်မှုလုပ်ငန်းဦးစီးဌာန၊ အစည်းအဝေးခန်းမတွင် အသေးစားစက်မှုလက်မှုလုပ်ငန်းဦးစီးဌာနနှင့် နားလည်မှုစာချွန်လွှာရေးထိုး၍ အသေးစားငွေကြေးဝန်ဆောင်မှုလုပ်ငန်းစီမံကိန်းကို ဆောင်ရွက်ခဲ့သည့် Pact Global Microfinance Fund (PGMF) ၏ လက်ရှိဆောင်ရွက်နေမှု အခြေအနေများနှင့်စပ်လျဉ်းသည့် ညှိနှိုင်းအစည်းအဝေးကို  စီမံကိန်းနှင့်ဘဏ္ဍာရေးဝန်ကြီးဌာန၊ နိုင်ငံခြားရေးဝန်ကြီးဌာန၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ဥပဒေရေးရာဝန်ကြီးဌာန၊ မြန်မာနိုင်ငံတော်ဗဟိုဘဏ်နှင့်  ပြည်ထောင်စုစာရင်းစစ်ချုပ်ရုံးတို့နှင့် ကျင်းပပြုလုပ်ခဲ့ပါသည်။

              အစည်းအဝေးတွင် အသေးစားစက်မှုလက်မှုလုပ်ငန်းဦးစီးဌာနမှ ညွှန်ကြားရေးမှူးချုပ်က PGMF ၏ လက်ရှိဆောင်ရွက်နေမှုအခြေအနေများအား  ရှင်းလင်းပြောကြားခဲ့ပြီး ဒုတိယညွှန်ကြားရေးမှူးချုပ် (နည်းပညာ)က အသေးစားစက်မှုလက်မှုလုပ်ငန်းဦးစီးဌာနနှင့် PGMF တို့ ဆောင်ရွက်ခဲ့သည့် လုပ်ငန်းဆောင်ရွက်မှုအခြေအနေများအား ရှင်းလင်းတင်ပြခဲ့ပါသည်။

              ထို့နောက် အစည်းအဝေးသို့ တက်ရောက်လာကြသည့် သက်ဆိုင်ရာဌာနများမှ တာဝန်ရှိသူများက PGMF ၏ လက်ရှိဆောင်ရွက်နေမှုအခြေအနေများအပေါ် ရှေ့ဆက်ဆောင်ရွက်ရမည့် လုပ်ငန်းစဉ်များအား ညှိနှိုင်းဆွေးနွေးခဲ့ကြကြောင်း သတင်းရရှိပါသည်။