27 Mar,2023

ဂွ မတ် ၂၆

      ရခိုင်ပြည်နယ် ဂွမြို့နယ်၌ (၇၈)နှစ်မြောက် တပ်မတော်နေ့ကို ဂုဏ်ပြုသောအားဖြင့် ကျေးလက်လမ်း ဖွံ့ဖြိုးရေးဦးစီးဌာနက ဆောင်ရွက်ပြီးစီးခဲ့သော ကမ်းသာယာကျေးရွာနှင့် မဒေါ့ကြောကျေးရွာတို့ကို ဆက်သွယ် ထားသောကျေးရွာချင်းဆက် ကွန်ကရစ်လမ်းသစ်ဖွင့်ပွဲကို မတ် ၂၅ ရက်က အဆိုပါလမ်းသစ်၌ ကျင်းပသည်။

       အခမ်းအနားတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးဇာနည်ကျော် က အမှာစကားပြောကြားပြီး မြို့နယ်ကျေးလက်လမ်းဖွံ့ဖြိုးရေးဦးစီးဌာနမြို့နယ်ဦးစီးအရာရှိ ဦးမြင့်ချိုက လုပ်ငန်းစီမံကိန်းနှင့် ပတ်သက်၍ ရှင်းလင်းပြော ကြားသည်။ ယင်းနောက်ကွန်ကရစ်လမ်းသစ်ကိုမြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် မြို့နယ်စီမံအုပ်ချုပ်ရေးအဖွဲ့ အဖွဲ့ဝင် (၁) ဗိုလ်မှူး သန့်ဇင်အောင်၊ မြို့နယ်ကျေးလက်လမ်းဖွံ့ဖြိုးရေးဦးစီးဌာန ဦးစီးအရာရှိ၊ ကမ်းသာယာ စခန်းမှူးနှင့် ကျေးရွာကိုယ်စားလှယ်တစ်ဦးတို့က ဖဲကြိုးဖြတ် ဖွင့်လှစ်ပေးပြီး ကွန်ကရစ်လမ်းသစ်ကို စစ်ဆေးသည်။

      အဆိုပါ ကွန်ကရစ်လမ်းသစ်မှာ ၂၀၂၂-၂၀၂၃ ဘဏ္ဍာနှစ် ပြည်နယ် ငွေလုံးငွေရင်း ရန်ပုံငွေကျပ် ၁၆၄ ဒသမ ၁၃၂ သန်းဖြင့် ဆောင်ရွက်သော ကမ်းသာယာ-မဒေါ့ကြော ကျေးရွာချင်းဆက်ကွန်ကရစ်လမ်းသစ်ဖြစ်ပြီး အရှည် ၀ ဒသမ ၇၁ ကီလိုမီတာရှည်ကာ မဒေါ့ကြော၊ ကမ်းသာယာ၊ ရေသိုး၊ ရွှေဦးကွင်း၊ ဂျိုလိမ် စသည့်ကျေးရွာများမှ ဒေသခံပြည်သူများ၏ စီးပွားရေး၊ လူမှုရေး၊ ပညာရေးများအတွက် အကျိုးပြုသည့် လမ်းတစ်လမ်းဖြစ်ကြောင်း သိရသည်။

ရွှေရည်ဝင်းကျော်