14 Mar,2023

ပွင့်ဖြူ၊ ဒေသဖွံ့ဖြိုးရေး

         မကွေးတိုင်းဒေသကြီး ပွင့်ဖြူမြို့နယ် မုန်းဇလဲကျေးရွာနှင့် ညောင်ပင်စောက်ကျေးရွာအား ဆက်သွယ်ဖောက်လုပ်ထားသည့် ကျေးရွာချင်းဆက်လမ်းမှာ မိုးရေတိုက်စားမှုကြောင့် ယိုယွင်းပျက်စီးနေသဖြင့် ဒေသခံကျေးလက်နေပြည်သူများရာသီမရွေး အဆင်ပြေစွာသွားလာနိုင်ရေး သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန မြို့နယ်ကျေးလက်လမ်းဖွံ့ဖြိုးရေးဦးစီးဌာနက၂၀၂၂-၂၀၂၃ ဘဏ္ဍာနှစ် ပြည်ထောင်စုပြင်ဆင်ထိန်းသိမ်းခြင်းရန်ပုံငွေဖြင့် မြေနီကျောက်စရစ်လမ်းအဖြစ် အဆင့်မြှင့်တင်ပြုပြင်ထိန်းသိမ်း ဆောင်ရွက်လျက်ရှိရာ ယခုအခါလမ်းပြုပြင်ထိန်းသိမ်းခြင်းလုပ်ငန်းမှာ ရာနှုန်းပြည့်ဆောင်ရွက် ပြီးစီးပြီဖြစ်ကြောင်း သိရသည်။

            အဆိုပါ ပွင့်ဖြူမြို့နယ် မုန်းဇလဲ-ညောင်ပင်စောက်ကျေးရွာချင်းဆက်လမ်းမှာ အရှည်ပေ ၁ မိုင် ၂ ဖာလုံကျော်ခန့်ရှိပြီး မိုးရေတိုက်စားမှု ဒဏ်ကြောင့် လမ်းပျက်စီးမှုများဖြစ်ပေါ်နေ၍ ဒေသခံကျေးလက်နေပြည်သူများ ကူးလူးဖြတ်သန်းသွားလာရာ၌ အဆင်မပြေမှုများနှင့် ကြုံတွေ့ နေရကြောင်းသိရ၍ မြို့နယ်ကျေးလက်လမ်းဖွံ့ဖြိုးရေးဦးစီးဌာနက ၂ဝ၂၂-၂၀၂၃ဘဏ္ဍာနှစ် ပြည်ထောင်စုပြင်ဆင်ထိန်းသိမ်းခြင်းရန်ပုံငွေကျပ် ၁၅ သန်းဖြင့် ဒေသခံပြည်သူများ ရာသီမရွေး အဆင်ပြေစွာသွားလာအသုံးပြုနိုင်ရေး မြေနီကျောက်စရစ်လမ်းအဖြစ် ဖေဖော်ဝါရီ ၂၅ ရက်ကစတင်ပြီး စက်ယန္တရားများဖြင့် ပြန်လည်ပြုပြင်ဆောင်ရွက်ခဲ့ရာ မတ် ၂ ရက် တွင် ရာနှုန်းပြည့်ပြုပြင် ဆောင်ရွက်ပြီးစီးခဲ့ကြောင်း ပွင့်ဖြူမြို့နယ်ကျေးလက်လမ်းဖွံ့ဖြိုးရေးဦးစီးဌာနဦးစီးအရာရှိ ဒေါ်မိမိလွင်ထံမှသိရသည်။

             ယခုအခါလုပ်ငန်းမှာ ဆောင်ရွက်ပြီးစီးသွားပြီဖြစ်၍ ဒေသခံပြည်သူများ တစ်ရွာနှင့်တစ်ရွာ လွယ်လင့်တကူကူးလူးဖြတ်သန်းသွားလာခွင့် ရရှိသွားပြီဖြစ်ကာ လယ်ယာမြေ များမှထွက်ရှိသော သီးနှံထွက်ကုန်များကိုလည်း အဆင်ပြေစွာသယ်ယူပို့ဆောင်နိုင်မည်ဖြစ်၍ ဒေသခံပြည်သူများ၏ လူမှုစီးပွားဘဝ ဖွံ့ဖြိုးတိုးတက်ရေးအတွက် များစွာအကျိုးပြုနိုင်တော့မည်ဖြစ်ကြောင်း ပွင့်ဖြူမြို့နယ် ကျေးလက်လမ်းဖွံ့ဖြိုးရေးဦးစီးဌာနမှ သိရသည်။

လှိုင်ဝင်းလေး(ပွင့်ဖြူမြေ)