14 Jan,2023

ပင်လောင်း၊ ဒေသဖွံ့ဖြိုးရေး

               ရှမ်းပြည်နယ် (တောင်ပိုင်း) ပင်လောင်းမြို့နယ် ကျေးလက်လမ်းဖွံ့ဖြိုးရေးဦးစီးဌာနက ပင်လောင်း မြို့နယ်အတွင်းရှိ ကျေးလက်လမ်းနှစ်လမ်းတွင် ကတ္တရာခင်းခြင်းလုပ်ငန်းများ ဆောင်ရွက်ပြီးစီးမှုကို တာဝန် ရှိသူများက ဇန်နဝါရီ ၁၃ ရက်တွင် ကွင်းဆင်းစစ်ဆေးသည်။

                  ထိုသို့ ကွင်းဆင်းစစ်ဆေးရာတွင် ပင်လောင်းမြို့နယ်၊ ကျေးလက်လမ်းဖွံ့ဖြိုးရေးဦးစီးဌာန ဦးစီးအရာရှိ (မြို့ပြ) ဒေါ်ခိုင်စုလင်းနှင့် တာဝန်ရှိသူများက ၂၀၂၂-၂၀၂၃ ဘဏ္ဍာနှစ်တွင် ပြည်ထောင်စုခွင့်ပြု ရန်ပုံငွေကျပ် ၁၃၆ ဒဿမ ၇၀၃၇ သန်းဖြင့် ပင်လောင်းမြို့နယ် ကျေးလက်လမ်းဖွံ့ဖြိုးရေးဦးစီးဌာနမှ တာဝန် ယူဆောင်ရွက်သည့် ဆောင်းပေါင်-တီရွေး-တီရွယ်-ပေါ့ယား-ကျောင်းနား-ကျောက်ဆောင်-လယ်ကြား-မွေတော် လမ်းတွင် မြေမှ ကတ္တရာခင်းခြင်းလုပ်ငန်း ဆောင်ရွက်ပြီးစီးမှုကိုလည်းကောင်း၊ ပြည်နယ်ရန်ပုံငွေကျပ် ၆၁ ဒဿမ ၅၂၃ သန်းဖြင့် ဆောင်ရွက်သည့် တီကျစ်-နောင်ကားမှီး-လုံးပိုး-လွယ်တောင်းလမ်းတွင် ကျောက်မှ ကတ္တရာခင်းခြင်းလုပ်ငန်း ဆောင်ရွက်ပြီးစီးမှုကိုလည်းကောင်း စစ်ဆေးကြပြီး လုပ်ငန်းလိုအပ်ချက်များကို ပေါင်းစပ်ညှိနှိုင်းဆောင်ရွက်ပေးသည်။

               ပင်လောင်းမြို့နယ် ဆောင်းပေါင်-တီရွေး-တီရွယ်-ပေါ့ယား-‌ကျောင်းနား-ကျောက်ဆောင်-လယ်ကြား -မွေတော်လမ်း ကတ္တရာခင်းခြင်းလုပ်ငန်းမှာ အရှည် ၅ ဖာလုံ၊ အကျယ် ၁၂ ပေ ဖြစ်ပြီး ၂၀၂၂ ခုနှစ် ဧပြီလ ၂၈ ရက် က လုပ်ငန်းများစတင်ဆောင်ရွက်ခဲ့ရာ လက်ရှိတွင် လုပ်ငန်းများရာနှုန်းပြည့်ပြီးစီးပြီဖြစ်ကြောင်း၊ တီကျစ်-နောင်ကားမှီး-လုံးပိုး-လွယ်တောင်လမ်း ကတ္တရာခင်းခြင်းလုပ်ငန်းမှာ အရှည် ၃ ဖာလုံ၊ အကျယ် ၁၂ ပေဖြစ်ပြီး  မေ ၁၉ ရက်တွင်စတင်ဆောင်ရွက်ခဲ့ရာ လက်ရှိတွင် လုပ်ငန်းများရာနှုန်းပြည့်ပြီးစီးပြီဖြစ်ကြောင်း သိရသည်။

 ကျော်ဇောဦး (မောရှမ်းမြေ)