05 Jun,2025

မြစ်ကြီးနား ဇွန် ၄

   ကချင်ပြည်နယ် မြစ်ကြီးနားမြို့နယ်ကျေးလက်လမ်းဖွံ့ဖြိုးရေးဦးစီးဌာနက ကျေးလက်နေ ပြည်သူများလမ်းပန်းဆက်သွယ်ရေး အဆင်ပြေလွယ်ကူပြီး ရာသီမရွေးသွားလာနိုင်ရန် ရည်ရွယ်၍ မော်ဖောင်းကျေးရွာအုပ်စု အထက်မော်ဖောင်းကျေးရွာနှင့် ငအိုးကျေးရွာတို့၌ ကျေးရွာချင်းဆက် လမ်း၊ တံတားများအဆင့်မြှင့်တင်ခြင်းလုပ်ငန်းများ ရာနှုန်းပြည့် ဆောင်ရွက်ပြီးစီးမှု အခြေအနေများကို ဇွန် ၂ ရက်နံနက်ပိုင်းကဒုတိယညွှန်ကြားရေးမှူးနှင့် တာဝန်ရှိသူများက ကွင်းဆင်းစစ်ဆေးသည်။

     ထိုသို့ ကွင်းဆင်းစစ်ဆေးရာတွင် ပြည်နယ်ကျေးလက်လမ်းဖွံ့ဖြိုးရေးဦးစီးဌာန ဒုတိယညွှန်ကြားရေးမှူး(မြို့ပြ) ဦးဝင်းဦး၊ ခရိုင်ကျေးလက်လမ်းဖွံ့ဖြိုးရေးဦးစီးဌာန လက်ထောက်ညွှန်ကြားရေးမှူး(မြို့ပြ) ဦးအောင်မြင့်ထွန်းနှင့်တာဝန်ရှိသူများသည် အထက် မော်ဖောင်းကျေးရွာ ကြိုးတံတားမှ ဝန်တင်တပ်သွားလမ်းအရှည် ၄ ဒသမ ၉ ဖာလုံ၊ အကျယ် ၁၆ ပေ၊ ဒု ၇ လက်မရှိ ကွန်ကရစ် လမ်းခင်းခြင်းလုပ်ငန်း ဆောင်ရွက်ပြီးစီးမှုအခြေအနေများကို ကြည့်ရှုစစ်ဆေးသည်။

    ဆက်လက်၍ ဒုတိယညွှန်ကြားရေးမှူး(မြို့ပြ)နှင့် တာဝန်ရှိသူများသည် ငအိုးကျေးရွာတွင် အရှည် ပေ ၃၀၀၊ အကျယ် ပေ ၂၀ ရှိ ကွန်ကရစ်တံတား တည်ဆောက်ခြင်းလုပ်ငန်း ဆောင်ရွက်ပြီးစီးမှု အခြေအနေများကို ကြည့်ရှုစစ်ဆေးသည်။ အဆိုပါ ကွန်ကရစ်လမ်းနှင့်ကွန်ကရစ်တံတားများသည် ပြည်နယ်ခွင့်ပြုရန်ပုံငွေများဖြင့်ဆောင်ရွက်ခဲ့ရာ ယခုအခါ လုပ်ငန်းများအားလုံး ရာနှုန်းပြည့် ဆောင်ရွက်ပြီးစီးပြီဖြစ်ကြောင်းသိရသည်။

မောင်ခိုင်