17 Feb,2025

မြိတ်မြို့နယ် ကွမ်းသီးချောင်ကျေးရွာ၌ မြေအောက်ရေရှာဖွေတိုင်းတာခြင်းများဆောင်ရွက်

***************************

မြိတ်      ဖေဖော်ဝါရီ       ၁၇

တနင်္သာရီတိုင်းဒေသကြီး၊ မြိတ်ခရိုင်ကျေးလက်ဒေသဖွံ့ဖြိုးတိုးတက်ရေးဦးစီးဌာနက ကျေးလက်ဒေသများတွင် သန့်ရှင်းသော သောက်သုံးရေရရှိရေးအတွက် စက်ရေတွင်းတူးဖော်ခြင်းလုပ်ငန်းများဆောင်ရွက်ရာ၌ နိုင်ငံတော်ဘဏ္ဍာရန်ပုံငွေလေလွင့်ဆုံးရှုံးမှုမရှိစေရန်အတွက် မြိတ်မြို့နယ်၊ ကွမ်းသီးချောင်ကျေးရွာ၌ မြေအောက်ရေတိုင်းတာခြင်း (Geophysical Survey)ကို တာဝန်ရှိသူများက (၁၆-၂-၂၀၂၅)ရက်နေ့ နံနက်ပိုင်းက ကွင်းဆင်းဆောင်ရွက်ခဲ့ကြောင်း သိရသည်။ 

ထိုသို့ကွင်းဆင်းတိုင်းတာရာတွင် မြိတ်ခရိုင် ကျေးလက်ဒေသဖွံ့ဖြိုးတိုးတက်ရေးဦးစီးဌာန ခရိုင်ဦးစီးမှူး ဒေါ်တင်တင်စိုး၊ မြိတ်မြို့နယ်ဦးစီးမှူး ဦးထွန်းထွန်းဝင်းနှင့် မြေအောက်ရေရှာဖွေတိုင်းတာရေးအဖွဲ့ တာဝန်ရှိသူများက ကွမ်းသီးချောင်ကျေးရွာ သောက်သုံးရေ ရရှိရေးကော်မတီဝင်များ၊ ကျေးရွာရပ်မိရပ်ဖများနှင့်အတူ မြေအောက်ရေရှာဖွေတိုင်းတာခြင်းများ ဆောင်ရွက်ခဲ့ပြီး ခရိုင်ဦးစီးမှူးက ကျေးရွာရေ ရရှိရေးကော်မတီဝင်များနှင့် ရပ်မိရပ်ဖများအား မြေအောက်ရေရှာဖွေတိုင်းတာရခြင်း၏ အားသာချက်များ၊ သောက်သုံးရေ ရရှိနိုင်သည့် နည်းလမ်းများကို ရှင်းလင်းပြောကြားသည်။

ကျေးလက်ဒေသဖွံ့ဖြိုးတိုးတက်ရေးဦးစီးဌာနသည် ကျေးလက်ဒေသများတွင် သန့်ရှင်းသော သောက်သုံးရေရရှိရေးအတွက် စက်ရေတွင်းတူးဖော်ခြင်းလုပ်ငန်းများ မဆောင်ရွက်မီကတည်းက မြေအောက်ရေရှာဖွေတိုင်းတာခြင်းများ ကြိုတင်ဆောင်ရွက်ထားသည့်အတွက် နိုင်ငံတော်ဘဏ္ဍာငွေ လေလွင့်ဆုံးရှုံးမှုမရှိသည့်အပြင် ကျေးလက်နေပြည်သူများအတွက် ဘေးကင်းလုံခြုံသော သောက်သုံးရေရရှိနိုင်မည်ဖြစ်ကြောင်း မြိတ်ခရိုင်ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ သိရသည်။