30 Jan,2025

ကွန်ဟိန်း ဇန်နဝါရီ ၂၉

         ရှမ်းပြည်နယ် (တောင်ပိုင်း) ကွန်ဟိန်းမြို့နယ် ကျေးလက်လမ်းဖွံ့ဖြိုးရေးဦးစီးဌာနမှ ကျေးရွာ ခြောက်ရွာကို အကျိုးပြုသည့် ပန်မှု့-ဝမ်ဟိန်းလမ်းအား ကျောက်ချောလမ်းမှ ကတ္တရာလမ်းသို့ အဆင့်မြှင့်တင်ခြင်းလုပ်ငန်း ဆောင်ရွက်ပြီးစီးမှု အခြေအနေများကို ဇန်နဝါရီ ၂၈ ရက်တွင် တာဝန်ရှိသူများက ကွင်းဆင်း စစ်ဆေးသည်။

          ထိုသို့ ကွင်းဆင်းစစ်ဆေးရာ ကွန်ဟိန်းမြို့နယ် ကျေးလက်လမ်းဖွံ့ဖြိုးရေးဦးစီးဌာနမှ အငယ်တန်းအင်ဂျင်နီယာ-၁ (မြို့ပြ) ဦးကျော်မိုးဦးနှင့် အရည်အသွေး ထိန်းသိမ်းရေး အဖွဲ့များက ကွင်းဆင်းစစ်ဆေးခဲ့ရာ တင်ဒါအောင်မြင်ခဲ့သည့် ကုမ္ပဏီမှ တာဝန်ရှိသူများက လမ်းဆောင်ရွက်ခဲ့မှု အခြေအနေများကို ရှင်းလင်းတင်ပြရာ တာဝန်ရှိသူများက လိုအပ်သည်များ ပေါင်းစပ်ညှိနှိုင်း ဆောင်ရွက်ပေးပြီး ကျေးရွာရှိ ရပ်မိရပ်ဖများ၊ လမ်းဖြစ်မြောက်ရေးကော်မတီဝင်များနှင့်တွေ့ဆုံကာ ဒေသဖွံ့ဖြိုး ရေးလုပ်ငန်းကို ရေရှည်တည်တံ့အောင် ဝိုင်းဝန်းကြိုးစား ဆောင်ရွက်ကြရန် ဆွေးနွေးမှာကြားသည်။

          အဆိုပါ ပန်မုံ့-ဝမ်ဟိန်း လမ်းသည်အရှည် သုံးဖာလုံ၊ အကျယ် ၁၂ပေ၊ ဒု ကိုးလက်မရှိ ကျောက်ချောလမ်းမှ ကတ္တရာလမ်းသို့ အဆင့်မြှင့်တင်ခြင်း လုပ်ငန်းကို ၂၀၂၄-၂၀၂၅ ဘဏ္ဍာနှစ် ပြည်နယ်ငွေလုံးငွေရင်းခွင့်ပြု ရန်ပုံငွေကျပ် ၁၃၀ ဒသမ ၀၄ သန်းဖြင့် တင်ဒါအောင်မြင်သည့် ကုမ္ပဏီမှ တာဝန်ယူအကောင် အထည်ဖော်ဆောင်ရွက်ခဲ့ရာ ယခု အခါ လုပ်ငန်းများအားလုံး ရာနှုန်းပြည့် ဆောင်ရွက်ပြီးစီးပြီ ဖြစ်ကြောင်း သိရသည်။

မောင်ခိုင်