15 Aug,2024

မြို့သစ် ဩဂုတ် ၁၄

         မကွေးတိုင်းဒေသကြီး မကွေးခရိုင် မြို့သစ်မြို့နယ်ကျေးလက်လမ်းဖွံ့ဖြိုးရေးဦးစီးဌာနမှ လေးတိုင်စင် ကျေးရွာရှောင်လမ်း ကျောက်အခြေခံလွှာခင်းခြင်းလုပ်ငန်းဆောင်ရွက်နေမှုကို ဩဂုတ်လ၁၄ ရက်တွင် တာဝန်ရှိသူများ ကွင်းဆင်းစစ်ဆေးကြောင်း သိရသည်။

       ထိုသို့ကွင်းဆင်းစစ်ဆေးရာတွင် ကျေးလက်လမ်းဖွံ့ဖြိုးရေးဦးစီးဌာန(ရုံးချုပ်)မှ အင်ဂျင်နီယာချုပ် ဦးကျော်ကျော်ထွေး၊ မကွေးခရိုင် ကျေးလက်လမ်းဖွံ့ဖြိုးရေးဦးစီးဌာနလက်ထောက်ညွှန်ကြားရေးမှူး ဦးဆလိုင်း နေအောင်ဆန်းနှင့် တာဝန်ရှိသူများက လေးတိုင်စင်ကျေးရွာလမ်းဖြစ်မြောက်ရေး ကော်မတီဝင်များနှင့်အတူ ကျေးရွာရှောင်လမ်း အရှည် ၇ ဒသမ ၈၈ ဖာလုံ၊ အကျယ် ၁၆ ပေ၊ ထု ၆ လက်မရှိ ကျောက်အခြေခံလွှာခင်းခြင်း လုပ်ငန်းဆောင်ရွက်နေမှုကို ကြည့်ရှုစစ်ဆေးပြီး အင်ဂျင်နီယာချုပ်က လုပ်ငန်းတာဝန်ခံအား သတ်မှတ် အရည်အသွေး ပြည့်မီစွာ အချိန်မီပြီးစီးအောင် ဆောင်ရွက်ရန် ပြောကြားသည်။

      မြို့သစ်မြို့နယ် ကျေးလက်လမ်းဖွံ့ဖြိုးရေးဦးစီးဌာနမှ ယခုဘဏ္ဍာနှစ်တွင် တိုင်းဒေသကြီးအစိုးရခွင့်ပြုငွေ ငွေကျပ် ၁၀၅ ဒသမ ၃၉၅ သန်းဖြင့် လေးတိုင်စင်ကျေးရွာရှောင်လမ်း ကျောက်အခြေခံလွှာခင်းခြင်းလုပ်ငန်းကို ဇူလိုင်လ ပထမပတ်က စတင်ဆောင်ရွက်ခဲ့ကြောင်းသိရသည်။                                                     

ငယ်လေး